Ukraina Yuqarı Şurası «Ukrainanıñ etnik milliy siyaseti: yeñişler ve istiqabeller» mevzusında parlament diñlevlerine yekün çekti

29 Mart 2012

Ukraina Yuqarı Şurasınıñ İnsan, milliy azlıqlar ve milletlerara munasebetler boyunca komiteti 2012 senesi yanvar 11 künü Ukraina Yuqarı Şurasında “Ukrainanıñ etnik milliy siyaseti: yeñişler ve istiqabeller” mevzusında olıp keçken parlament diñlevleriniñ neticeleri boyunca “”Ukrainanıñ etnik milliy siyaseti: yeñişler ve istiqballer” mevzusındaki parlament diñlevleriniñ tevsiyeleri aqqında” Ukraina Yuqarı Şurası qararınıñ leyhasını maqullep, onı esas olaraq qabul etmekni tevsiye etti.

Ukraina Yuqarı Şurasınıñ İnsan, milliy azlıqlar ve milletlerara munasebetler boyunca komitet azaları parlament diñlevleriniñ iştirakçilerinden tüşken bütün tekliflerni talil eterek, “Tevsiyeler”niñ soñki variantı boyunca añlaşıp, onı endi Ukraina Yuqarı Şurasına – Ukraina halq deputatları Öleg Zarubinskiy, Viktor Taran, Mustafa Cemilev, İvan Popesku, Yuriy Gnatkeviç ve i Yelene Bondarenkoğa baqmaqnı avale ettiler. .”Tevsiyeler”niñ leyhasında cümleden qayd etile ki, bugünde-bugün Ukrainada 139 millet vekili yaşap, olarnıñ umumiy sayısı 10 million yani Ukraina ealisiniñ 22 fayızını teşkil ete. Ukraina

Prezidenti, Ukraina Yuqarı Radası, Ukraina Nazirler Kabineti ve diger devlet organlarına tevsiler sırasında cümleden şularnıñ da zarurlığı qayd olundı:

– devlet etnik milliy siyasetni şekillendirüv ve amelge keçirüv boyunca merkeziy icra organını meydanğa ketirmek;

– devlet etnik milliya siyaset saasında, hususan milletler, din ve ırqlarara munasebetlerniñ bozulmasına alıp kelgen areketler içün mesülietni arttırmaq;

– “Milliy mensüpligi boyunca sürgün etilgen şahıslarnıñ aqlarını ğayrıdan tiklev aqqında” (№ 5515)” qanun leyhasını acele baqmaq;

– milliy mensüpligi boyunca sürgün etilgen ve endi Ukrainağa qaytmaqta olğan qırımtatarlarnı ve diger şçahıslarnı yerleştirmek, ukrain cemiyetine qatılmasına qoltutmaq.

Bundan ğayrı Ukraina Sotsial siyaset nazirligi Ukraina tışqı işler nazirligi ve diger devlet organlarınen beraber eñ yaqın vaqıtta milliy mensüpligine köre sürgün etilgen şahıslarnıñ meseleleri boyunca halqara tedbir keçirmek tevsiye etildi. Tedbir Ukraina Yuqarı Şurası tarafından bu saada qabul etken qanunları ve sürgünlikten Ukrainağa qaytıp kelgen ve ukrain cemiyetine qoşulğan qırımtatarlar ve diger millet vekillerini yerleştirüv programmasınıñ işlenilüv vaziyeti esapqa alınğanı köz ögünde tutulıp, keçirilmesi planlaştırıla.

“Tevsiyeler”niñ tolu metininen Ukraina Yuqarı Şurasınıñ İnternet saifesinde ya da mında tanış olmaq mümkün.