Ukraina Yuqarı Şurası «Milliy mensüpligi boyunca sürgün etilgen şahıslarnıñ aqlarını ğayrıdan tiklev aqqında» Ukraina qanunınıñ leyhasını birinci oqulışta qabul etti

20 Iyün 2012

2012 senesi iyün 20-de Ukraina Yuqarı Şurası “Milliy mensüpligi boyunca sürgün etilgen şahıslarnıñ aqlarını ğayrıdan tiklev aqqında” Ukraina qanunınıñ leyhası içün rey berilgende müsbet qarar almağa cürat etti. Parlamentniñ sessiyalar salonında cedvelge alınğan 420 nefer Ukraina halq deputatından 356-sı Qırımtatar halqı Meclisiniñ reisi, Ukraina halq deputatı Mustafa Cemilev müellifi olğan № 5515 Qanun leyhasına qoltuttı 

“Milliy mensüpligi boyunca sürgün etilgen şahıslarnıñ aqlarını ğayrıdan tiklev aqqında” Ukraina qanunı leyhasınıñ qabul etilmesi boyunca devamlı ve mürekkep iş şunı köstere ki, 1944 senesi mayısta sürgün etilgen qırımtatar halqınıñ qanuniy aqları ve adaletni tiklev aqqında qanunnıñ resmiy qabul olunması yolunda birinci adım atıldı”, – dedi Meclis reisi M. Cemilev. 

Aynı zamanda leyha müellifi birinci oqulışta qoltutılğan qanun leyhasınıñ kelecegi hususında tahmin ete ki, qanun tek parlament seçimleri keçip, Ukraina akimiyetiniñ qanunâratıcı organı şekillengen soñ kesen-kes qabul etilir.