Ukraina Yuqarı Şurası «Milliy mensüpligi boyunca sürgün etilgen şahıslarnıñ aqlarını ğayrıdan tiklev aqqında» qanun leyhasınıñ muzakeresini kene artqa taşladı

16 Mayıs 2012

2012 senesi mayıs 16 künü Ukraina Yuqarı Şurası “Milliy mensüpligi boyunca sürgün etilgen şahıslarnıñ aqlarını ğayrıdan tiklev aqqında” qanun leyhasını muzakere etmek içün yeterli rey toplap olamadı.

Qanun leyhasınıñ müellifi, Qırımtatar halqı Meclisiniñ reisi, Ukraina halq deputatı Mustafa Cemilevniñ haber etkenine köre, qanun leyhasınıñ birinci oquvı içün zarur 226 rey yerine ancaq 177 deputat rey berdi. 366 deputatnıñ reyleri boyunca mezkür qanun leyhası ğayrıdan işlenmesi içün İnsan aqları, milletlerara munasebet ve milliy azlıqlarnıñ meseleleri boyunca komitetke yollanıldı. Qanun leyhasınıñ tekrar muzakeresini kelecek afta mayıs 22-den mayıs 25-ke qadar keçirmek qararı alındı. Bu vaqıtqa qadar Ukraina Nazirler kabineti ait iqtisadiy esap-kitapnı taqdim etmesi kerek.

Şunı qayd etmeli ki, “Milliy mensüpligi boyunca sürgün etilgen şahıslarnıñ aqlarını ğayrıdan tiklev aqqında” qanun leyhasınıñ birinci oquvda qabul etilmesi içün Regionlar partiyası fraktsiyasından yalıñız 7 deputat, “Batkivşçina-BÜT” fraktsiyasından – 97, “NU-NS” fraktsiyasından 47, Halq partiyası fraktsiyasından – 20, “Reformi zaradi maybutnogo” gruppasından – 2 ve fraktsiyadan tış 4 deputat rey berdi. Ukraina Kommunist partiyası fraktsiyasınıñ deputatları rey berüvde iştirak etmediler, amma bundan evel fraktsiyanıñ başı Pötr Simonenko öz çıqışında qırımtatar halqı sürgünliginiñ aqlı olğanını açıqtan-açıq söyledi.

Mustafa Cemilevniñ fikrince, qırımtatar halqı sürgün etilgeniniñ 58 yıllığı arfesinde qanun leyhasınıñ muzakeresi içün rey berüv neticeleri Ukraina parlamentiniñ qırımtatar halqı soyqırımı qurbanlarına sayğısızlıq köstergenini ve qırımtatar halqınıñ aqlarını ğayrıdan tiklemege istemegenini numayış etti.

“Zanımca, yetekçi partiyası deputatları da Ukraina Yuqarı Şurası “Milliy mensüpligi boyunca sürgün etilgen şahıslarnıñ aqlarını ğayrıdan tiklev aqqında” qanun leyhasına qoltutqan Ukraina Prezidenti Viktor Yanukoviçke nisbeten de ürmetsizlik kösterdiler.