Ukraina Yuqarı Şurası İnsan aqları ve milletlerara munasebetler boyunca komitet azaları Aqmescit rayonında qırımtatarlar toplu yaşağan qasabanı ziyaret ettiler

12 April 2013

2013 senesi aprel 11-de Ukraina Yuqarı Şurasınıñ İnsan aqları ve milletlerara munasebetler boyunca komitet azaları Qırım Yuqarı Şurasında ötkerilgen seyyar toplaşuvdan soñ Aqmescit rayonında qırımtatarlar toplu yaşağan qasabanı ziyaret ettiler.

Bu qasaba bundan 20 yıl evelsi sürgünlikten qaytqanlar tarafından quprulğan edi. O vaqıtta sovet akimiyeti Qırımğa qaytayatqan qırımtatarlarnıñ yolunı qapatmaq maqsadında mesken qurucılığı, yaşayış şaraitlerini yaratuvda iç bir türlü yardım etmediler, topraq ayırılmasına qatiyen qarşı çıqtılar. Akimiyetniñ böyle davranışı qırımtatarlarnıña aqlı ğadabını qozğadı ve olar bütün bir qasabalarnı öz küçlerinen qurıp, topraqnı öz başına işğal etmek zoruna qaldılar.

Bu ise öz nevbetinde yarımadada kerginlik meydanğa kelmesine sebepçi olıp, bazıda qanlı çarpışmalarnı qozğay bilirdi. Şunı da qayd etmeli ki, qırımtatar qasabalarnıñ bir çoqlarında bugün de zarur sotsial-medeniy obyektler yoq, gaz, suv, elektrik ağları keçirilmegen. Bular içün endi ukrain akimiyeti mesülietlidir.

Komitet reisi Valeriy Patskannıñ yolbaşçılığındaki delegatsiya azaları, “Udar” partiyasından Ukraina halq deputatı Aleksandr Moçkov ve Meclis reisi Mustafa Cemilev böyle qasabalardan birisi Aqmescitteki Pionerskoye-3 qasabasını ziyaret ettiler. Delegatsiyanı Meclis reisiniñ birinci muavini Refat Çubarov, reis muavini Remzi İlyasov, tışqı alâqalar bölüginiñ başı Zair Smedlâyev ve topraq komissiyasınıñ başı Zevcet Kurtumerov ozğarıp bardılar. Enişli-yoquşlı yollardan yetip bardığı qasaba merkezinde deputatlar qasaba sakinlerinen körüştiler. Qasabanıñ problemlerini deputatlarğa ve musafirlerge şu qasabada temeli qoyulğanınıñ birinci kününden ailesinen yaşağan 5 çağırılış Qurultaynıñ delegatı, “Qırım” hayriye fondınıñ baş direktorı Riza Şevqiyev tarif etti.

Massiv sakinleri akimlerniñ adaletsiz munasebetlerini isbatlağan konkret misaller ketirip, qasabada mektep, balalar bağçası, tibbiyet noqtası, yol ve elektirik yoluğını qayd ettiler.

Komitet azaları Qırım Yuqarı Şurasında 3 saat devamında qırımtatar halqınıñ vaziyetine dair meselelerni muzakere etken soñ vaziyetniñ ne derecede ağır olğanını kendi közlerinen körip iqrar oldılar. Bu hususta fikir paylaşqan Ukraina Yuqarı Şurası Komitetiniñ azaları Qırımdaki vaziyetni tüzetmek, qırımtatar halqınıñ ögünde turğan meselelerni çezmek işini Ukraina akimiyeti öz nezareti altına almaq kerekligini qayd ettiler.

Ayrıca şu da qayd etildi ki, Qırım akimiyeti kerginlikni yımşatmaq yerine soñki areketlerinen bu vaziyetni daa ziyade beterleştire.