Ukraina Yuqarı Şurası İnsan aqları komitetiniñ azaları Ukraina İçki işler naziri Vitaliy Zaharçenkonı vazifesinden boşatılmasını talap eteler

18 Iyül 2013

2013 senesi iyül 18 künü parlamentniñ İnsan, milliy azlıqlar ve milletlerara munasebetler komiteti azaları uquqqoruv organları qanun ve insan aqlarını qorçalamasınen bağlı vaziyet boyunca beyanat qabul ettiler.

Beyanatnıñ qabul etilmesine İçki işler nazirliginiñ hadimleri tarafından insanlarğa nisbeten zulum kösterilgeni ve yolbaşçılar ise böyle faktlarnıñ üstüni qapatmağa tırışqanı sebepçi oldı.

Beyanatnı imzalağan Ukraina halq deputatı, Milliy Meclis reisi Mustafa Cemilev uquqqoruv organlarınıñ bugünki faaliyeti sovet ceza sistemine tayana, dep saya ve bu sistemanı bozmaq kerek, degen fikirdedir. Ebet böyle deñişmelerni keçirmek mürekkep, amma devlet reberleri iradeli olsalar, eali de olarğa qoltutsa bunı yapmaq daa mümkün. Qırımtatarlar yetekçisiniñ fikrince, bu ceryanda üçünci sektor yani ükümetqa bağlı olmağan teşkilâtlarnıñ rolü büyüktir. Olar ukrain cemiyetini birleştirgen küç olmaları lâzim.

Meclis reisi devletniñ ğayet mürekkep meselelerinen bağlı bütün tedbirlerde – olsun devlet yolbaşçılarınen körüşüv, Ukraina Milliy telükesizligi ve mudafaa keñeşiniñ işinde, ekspert cemiyetlerniñ muzakereleri ve vatandaşlarnen subetlerde iştirak etmege azırlığını bildirdi.

“Bizim cemiyetimiz uquqqoruv sistemasınıñ yapıcı olmağan vazifelerinen bağlı içki davanı barışıqlı ya da zorbalıqlı al etmek yolları ögünde turmaqta. Biz bunıñ kibi de mezkür meseleniñ çezimini devletni tekmil zayıflatqan, çürügen keçmişlerini saqlap qalmaq niyetinde insanlarnı biri-birine sıttırğan prokuratura ve mahkemelerniñ çürügen qurumını bozuvnen bağlamaq kerekmiz”, – dep qısqadan izaatladı Mustafa Cemilev parlament Komiteti tarafından qabul etilgen Beyanatnı ve memlekette meydanğa kelgen vaziyetni.