Ukraina Yuqarı Şurası № 5515 Qanunnı qabul etmege azırlana

12 Aprel 2012

“Milliy mensüpligine köre sürgün etilgen şahıslarnıñ aqlarını ğayrıdan tiklev aqqında” Ukraina Qanunını qabul etüv boyunca yapılğan uzun müddetli ve mürekkep iş Qırımtatar halqı Meclisiniñ reisi, Ukraina halq deputatı Mustafa Cemilevniñ fikrince yañı basqıçqa kirdi.

Ukraina Prezidenti memuriyeti başınıñ muavini Stanislav Skubaşevskiy, Ukraina Prezidentiniñ mesleatçısı, içtimaiy-siyasiy ve sotsial meseleler boyunca baş idaresiniñ reberi Anna German, bunıñ kibi de Ukraina Prezidentiniñ Ukraina Yuqarı Şurasında temsilcisi, halq deputatı Yuriy Miroşniçenko ile keçenlerde ötkerilgen körüşüvlerde devlet yolbaşçısınıñ mezkür qanunnıñ qabul etilmesine müsbet baqışı qayd olundı. Qanunnı qabul etüv ğayesine Ukraina Yuqarı Şurasınıñ reisi Vladimir Litvin de qoltuta.

№ 5515 Qanun leyhasınıñ muzakeresi 2012 senesi aprel 24-27 künlerine tayinlendi. Leyha birinci oqulışta qabul etile bilir. “Onıñ azırlıq ve halqara ekspertler, şu cümleden OSCE ve Avropa Şurası tarafından qoltutılğanınıñ seviyesi Qanun leyhasını umumen qabul etmege esas olur”, – dedi Ukraina halq deputatı Mustafa Cemilev.

Bundan kelip çıqaraq, Meclis reisi Ukraina halq deputatlarına Qanun leyhasına tolusınen qoltutmaları ricasınen muracaatta bulunmaq maqsadında ki, qanun tezce küçke kirsin. Qanun leyhasına 2004 senesi de çoqluq qoltutqan edi, lâkin Prezident veto aqqından qullanıp, qabul etilmesini toqtattı.