«Ukraina qırımtatar halqına nisbeten qanun aktlarını qabul etecegine ümüdimiz bar» – dedi Petr Hleboviç

19 Mayıs 2012

Qırımtatarlarnı Vatanğa qaytaruv oğrunda küreşçilerniñ biri, poloniyalı cemaat erbabı ve uquqqoruyıcı Petr Hleboviç, Bütünqırım matem mitinginiñ iştirakçilerine hıtap eterek, dedi ki, kendisi ve bir çoq dostları mayıs 18 künü qırımtatar halqınen beraber onıñ ağrısını paylaşalar. “Er sene Poloniya delegatsiyası qırımtatar halqı sürgünligi qurbanlarınıñ hatırasını añmaq içün Qırımğa kele, – dedi P. Hleboviç.

Öz çıqışında o, Ukraina parlamentinde mayıs 16 künü olıp keçken vaqianı yani Ukrainanıñ “Milliy mensüpligi boyunca sürgün etilgen şahıslarnıñ aqlarını ğayrıdan tiklev aqqında” Qanunınıñ leyhası bünca rey berilgen vaqıtta kommunist partiyasınıñ deputatı Qırımnıñ asıl halqı olğan qırımtatarlarnı aqaretlegenini de aytıp keçti.

“Poloniyada bulunır ekenmiz, biz bu masharalıqnı közetip turdıq. Ukraina Yuqarı Şurasınıñ deputatları öz Vatanından zorbalıqnen quvulğan halqnıñ aqlarını tikleycek qanunnı kene qabul etmege istemediler, – dedi Petr Hleboviç. – Qırımtatarlarnıñ bir Vatanı bar – o da Qırım. Biz ümüt etemiz ki, Ukraina qırımtatar halqına nisbeten qanunnı qabul eter”.

Malümat içün:  2012 senesi mayıs 18-de Qırımda Qırımtatar halqı öz tarihiy Vatanı Qırımdan sürgün etilgeniniñ 68 yıllığına bağışlanğan Bütünqırım matem mitingi olıp, onda 30 biñden ziyade insan iştirak etti