Ukraina qanunlarında qırımtatarlarnıñ avdeti ve yerleşmesine manialarnı yoq etüv aqqında

18 May 2012

Ukraina Prezidentine

Ukraina halq deputatlarına

Ukraina Nazirler Kabinetine

1944 senesi mayıs 18-de sürgün etilgen qırımtatar halqı qurbanlarınıñ hatırasına bağışlanğan Bütünqırım matem mitinginiñ qararı

Ukraina qanunlarında qırımtatarlarnıñ avdeti ve yerleşmesine manialarnı yoq etüv aqqında

Ukraina Yuqarı Şurası tarafından 2011 senesi dekabr 22 –de qabul etilgen ve küçke kirgen Ukraina №4220-VI “Ukrainanıñ şeer qurucılığı faaliyetinde devlet regulâtsiyasını mükemmelleştirüv ve mesülietni yükseltüvge nisbeten bazı qanun aktlarına deñişmeler kirsetüv aqqında” qanunına binaen qırımtatarlarnıñ qaytması ve yerleşmesi yolunda yañı, keçilmez manialar tiklendi.

Bugünde-bugün qırımtatarlar toplu yaşağan 300-den ziyade qasabalarda on biñlernen qırımtatar aileleri devlet tarafından iç bir türlü yardım körmeden 10-15 yıldan berli evlerini soñki imkânlarını ortağa qoyıp qurmaqtalar. Qurucılığı daa bitmegen evde yaşamağa mecbur olğanlarında olar qabaatlı degil.

Aynı zamanda mezkür qanunnıñ normalarına köre 2013 senesi yanvar 1-den evleri faydalanuvağa teslim etilmegen ev saipleri pek büyük cöreme tölemege mecbur olacaqlar.

Böyleliknen, Qırımğa qaytıp kelgen on biñlernen qırımtatarlar devletniñ qoltutuvı yerine yañı, qanunlaştırılğan yağma ve şantajğa oğratıla bileler.

Biz, qırımtatar halqınıñ 1944 senesi mayıs 14 sürgünligi qurbanlarınıñ hatırasına bağışlanğan bütünqırım matem mitinginiñ iştirakçileri Ukraina Prezidenti, Ukraina halq deputatları, Nazirler Kabineti Ukrainanıñ “Ukrainanıñ şeer qurucılığı faaliyetinde devlet regulâtsiyasını mükemmelleştirüv ve mesülietni yükseltüvge nisbeten bazı qanun aktlarına deñişmeler kirsetüv aqqında” qanunına qaytıp kelmekte ve yerleşmekte olğan qırımtatarlar içün olarnı köteralmaycaq masraf ve ödemelerden azat etip, şahsiy evlerni qurmaq ve faydalanuvğa teslim etmekniñ hususiy tertibini közde tutqan deñişmeler kirsetmekniñ çaresini acele körmege çağıramız.
 

Qırımtatar halqı genotsidi qurbanlarınıñ hatırasına bağışlanğan Bütünqırım matem mitinginde qabul etildi

Aqmescit ş., 2012 senesi mayıs 18.