Ukraina insan ve az sayılı tamır halqlarnıñ aqlarını qorçalavda halqara tecribege muhtac

03 May 2013

2013 senesi mayıs 3-te Meclis reisi, Ukraina halq deputatı Mustafa Cemilev  Avstriyanıñ Ukrainadaki Vefqulade ve Toluvekâletli elçisi  Volf Ditrih Haym ile körüşti. Bağçasarayda olıp keçken bu körüşüvde Meclis reisiniñ birinci muavini Refat Çubarov ve Meclisniñ tışqı alâqalar bölüginiñ başı Ali Hamzin iştirak ettiler.
Subetdeşler Qırımda ve Ukrainada siyasiy-içtimaiy vaziyetnen bağlı bir sıra meselelerni, bunıñ kibi qırımtatar halqınıñ alını da muzakere ettiler. Avstriya elçisiniñ ricasına köre Meclis reisi Pragağa iş ziyareti, Çehiya Tış işleriniñ naziri Karel Şvartsenberg ile olğan körüşüvi aqqında ikâye etti.

“Avropada tanılğan ve ikmetli Karel Şvartsenbergniñ Qırımtatar halqı vekâletli organı Meclisniñ maqsadları ve qırımtatar halqı aqlarını tiklev oğrundaki küreşine qoltutması  qırımtatar halqı meselesiniñ çezilmesine ümüt  bağışlay ve siltem bere, – dedi Mustafa Cemilev.  – Şunı da qayd etmeli ki, Çehiyanıñ Tış işler nazirligi Karel Şvartsenbergniñ Meclis reberlerinen körüşüvi aqqında resmiy haber berdi. Eñ müimi ise Çehiya Tış işler nazirligi  OSCE imayesi altında ötkerilecek Halqara forum keçirilmesine yardım etmege azırlığını tekrar tasdiqladı”

Milliy problemlerni çezüvde  Avropa tecribesiniñ tesiri boyunca fikir paylaşılğanda Meclis vekilleri 2013 senesi noyabr ayında Vilnüste keçirilecek Ukraina-Avropa Birligi sammitiniñ neticeleri qırımtatar meselesiniñ çezilmesine zarur şaraitler yaratır, degen ümüt bildirdiler.

“Avstriya bugün Avropa devletleri cemiyetinde milliy meselelerni çezüvde bayağı bir tecribe saibi olğanı içün de qırımtatar problemini seslendirmege aqlıdır, – dedi Avstriyanıñ Ukrainadaki Vefqulade ve Toluvekâletli elçisi  Volf Ditrih Haym. – Milletler ve dinlerara stabilligi meseleleri er angi devalet içün eñ müim mevzudır. Bu esnada Avstriya devleti öz tecribesinen paylaşmağa azır olaraq, Ukrainanıñ ocası ya da ustazı olmaq niyeti yoqtır”

Halqara forumğa azırlıq meselelerini muzakere etüv  devamında  Avstriyanıñ elçisi  V.D. Haym Meclis reberlerine forum keçirilmesiniñ tarafdarı olğanı ve meslekdeşleri olğan Türkiyeniñ ve Amerikanıñ Ukrainadaki elçilerinen, olar ise belli ki Meclisniñ Forumğa dair teşebbüslerini maqulleyler, sıqı alâqada bulunğanını bildirdi.

Körüşüvniñ soñunda taraflar dialog ve sıqı emekdaşlıqnı devam ettirmek istegini bildirdiler ve şu munasebetle Avstriyanıñ Elçisi Meclis başqanı Mustafa Cemilevniñ kendisi içün oñaytlı bir vaqıtta Venanı ziyaret etmege davet etti.