«UKRAİNA ETNİK MİLLİY DEVLET QAVRAYIŞI AQQINDA» UKRAİNA QANUNINIÑ LEYHASINI MUZAKERE ETEMİZ

20 Fevral 2012

Malüm ki, 2012 senesi yanvar 11 künü Ukraina Yuqarı Şurasında “Ukrainanıñ etnik milliy siyaseti: yeñişler ve istiqballer” mevzusı boyunca ötkerilgen parlament diñlevlerinde Qırımtatar halqı Meclisiniñ reisi, Ukraina halq deputatı Mustafa Cemilev çıqışta bulunğan edi.

Öz çıqışında Mustafa Cemilev “Ukraina Yuqarı Şurasınıñ elektron bazasında ta 2005 senesinden berli o zamanda Ukraina halq deputatı Refat Çubarov Ukrainanıñ yetekçi mütehassıslarınen birlikte azırlağan ve cedvelge kirsetken “Ukraina devlet etnik milliy siyasetiniñ qavrayışı aqqında” qanun leyhası saqlanğanının qayd etip, o leyhanı bugünki halq deputatları muzakere etmeleri içün esas olaraq qabul etilmesini teklif etti.

Aşağıda biz “Ukraina devlet etnik milliy siyasetiniñ qavrayışı aqqında” qanun leyhasını, izaatını ve leyha soñuçı, bunıñ kibi de mezkür qanun leyhası müellifleriniñ vazifeleri de kösterilgen erkânını taqdim etemiz.

(Bu dokumentlerniñ asıl nushalarınen Ukraina Yuqarı Şurasınıñ saifesinde de tanış olmaq mümkün)

Qırımtatar halqı Meclisiniñ saifesinde mezkür dokumentlerni yerleştirgenimizden maqsad epsi meraqlanğanlar, ilk-evelâ qırımtatar cemaat teşkilâtları ve etnik milliy munasebetler ve halqara uquq saasındaki mütehassıslarnı “Ukraina devlet etnik milliy siyasetiniñ qavrayışı aqqında” qanun leyhasınıñ muzakeresine celp etmektir.

Qanun leyhası boyunca qaydlar, qoşumca ve tüzetüvlerni yazma şekilde 2012 senesi mart 4-ke qadar:

• Qırımtatar halqı Meclisi saifesinde “Bağlanuv” sisteması vastasınen, ya da
• poçta ile Qırımtatar halqınıñ Meclisine, Aqmescit ş., Şmidt soqağı, 2. Ukraina . Qırım Muhtar Cumhuriyeti, 95 017 adresine yollamaq mümkün.

Qanun leyhası boyunca qaydlar, qoşumca ve tüzetüvlerni yollağan insan öz adı, soyadı, adres ve bağlanmaq içün telefon nomerini de köstermesi lâzim. Muzakere bitken soñ qanun leyhası tüşken qaydlar, qoşumca ve tüzetüvler esapqa alınğanı alda Ukraina Yuqarı Şurasında cedvelge alınacaq.

№ 7615, 06.06.2005. s. qabul etilgen  “Ukrainanıñ devlet etnik milliy siyasetiniñ mevhumı  aqqında” Ukraina Qanunınıñ leyhası

“Ukrainanıñ devlet etnik milliy siyasetiniñ mevhumı aqqında” Ukraina Qanunınıñ leyhasına AÇIQLAYICI QAYDLAR

“Ukrainanıñ devlet etnik milliy siyasetiniñ  mevhumı aqqında” Ukraina Qanunınıñ leyhasınıñ  HULÂSALARI (cedvelde sırası № 7615)

“Ukrainanıñ devlet etnik milliy siyasetiniñ mevhumı aqqında” Ukraina Qanunınıñ leyhasını  azırlav boyunca işçi gruppanıñ erkânı