Uçucısız aletlerniñ ücümi sebebinden işğalciler Canköy rayonınıñ sakinleriniñ tahliyesini ilân ettiler

24 Iyül 2023

Canköy rayonınıñ bir qaç köyünde tahliye ilân etildi. Qırımnıñ işğal başı Serhiy Aksönov bunı bildirdi, dep Qırım.Aqiqat haber berdi.

Bundan evel o, uçucısız aletlerniñ anbarına ücüm etkenini tanıdı.

“Canköy rayonında fevqulâde adise yerinden 5 kilometrlik radiusta ertaftaki köylerniñ ealisini tahliye etmege qarar berildi. İlk malümatqa köre, yaralanğanlar yoq», – dep yazıldı.

Bundan ğayrı Aksönov haber berdi ki, “telükesizlik maqsadınen” Canköy rayonında demiryol ve Canköy-Aqmescit maşna qara yolunda areket toqtatıldı.

Oraq ayınıñ 24-ünde saba maalinde işğalciler bildirdiler ki, Qırım üstünde avada 11 uçucısız alet sanki yoq etildi. Canköy rayonında silâ anbarından ğayrı, uçucısız aletlerniñ parçaları İslâm Terek rayonındaki mesken evge zarar ketirdi.