Qırımda quvetçiler siyasiy mabüslerni qorçalağan advokatlarnıñ ofislerini tinttiler

11.12.2025

İlk qış ayınıñ 11-nde saba vaqtınca işğal etilgen Qırımda “E Merkezi”niñ hadimleri uquq qorçalayıcı faaliyeti ve siyasiy mabüslerni yıllar devamında qorçalap, belli olğan Qırım advokatlarınıñ ofisinde tahqiqat tedbirlerini keçirdiler.

Tintüv vaqtında ofiste advokat Edem Semedlâyev, em de Nazim Şeyhmambetov, Elvina Semedlâyeva, Rustem Kemilev ve Lilâ Gemeci buluna ediler. Quvetçilerniñ areketlerini “E Merkezi”niñ Qırım bölüginiñ yolbaşçısı Ruslan Şambazov idare ete edi. Advokat Emil Kurbedinovnı ofisine yibermediler.

Soñra belli olğanı kibi, “teşkerüv” işğalli Qırım İçki işler nazirliginiñ polisiniñ yolbaşçısınıñ muavini Dmitriy Nesterovnıñ muracaatından soñ sözde Qırım Yuqarı mahkemesiniñ qararınen amelge keçirildi.

“Mahkemeci” Viktor Sklârovnıñ çıqarğanı qararda, adliyecilerniñ Rusiye Federatsiyası Ceza qanunnamesiniñ 205.5-nci, 205.1-nci ve 199-ncı maddelerine köre “terror teşkilâtınıñ faaliyetini teşkil etüv”, “terror faaliyetine yardım etüv” ve “bergi tölememesi” kibi “cinayetler”de iştirak etkenlerinde şübheli sayılmaq içün “yeterli sebepler” bar olğanı qayd etile.

Quvetçiler bildirdi ki, ofislerinde “malümat aletleri” ya da “qanunsız faaliyetni tasdıqlağan” diger şeyler saqlana bile.

Tintüv vaqtında işğalli quvetçiler advokat añlaşmalarını, Emil Kurbedinov ve Edem Semedlâyevniñ advokatlarnıñ emirlerini ve Kurbedinovnıñ advokat müürini aldılar.

Qırımtatar Milliy Meclisiniñ reisi Refat Çubarov bugünki tintüvlerni Qırımda Rusiye akimiyetiniñ daa bir cinayeti dep adladı.

“Bugün Qırımdaki adliyecilerniñ ofisine yapılğan ücüm ve olarğa qarşı cinaiy taqip telükesi, işğalli Rusiye qurulışları tarafından qırımtatarlarğa yapılğan basqılar ve taqipler şaraitinde Qırım cemiyetini er angi qoruvdan marum etmek maqsadınen yapılğan areketler olaraq qabul etilmeli. Qırımda siyasiy sebeplerden açılğan ve uydurılğan cinaiy davalarnı baqmağa qorqmağan advokatlarnı tapmaq imkânsız edi. Bundan ğayrı, işğalli Rusiye organları bu advokatlarnı ihtisas faaliyetini alıp barmaq imkânından marum qaldıra bilseler, eñ yaqın vaqıtta qırımtatarlarğa qarşı yañı ve büyük repressiyalarnı beklemek mümkün olur”, – dep o tefsir etti.

Advokatlar ve uquqçılarnıñ iç birisi şimdilik tutulmadı.