Türkiyeniñ Litvaniyadaki Elçisi Ukraina ve Türkiye Tış işleri nazirligi, Qırım Nazirler Şurası ve Meclis yolbaşçılarınıñ iştirakinde qırımtatarlar meselesini muzakere etmek içün 4 taraflı körüşüvniñ 2-nci raundı keçirilmesine qoltuta

24 Oktâbr 2013

Meclis delegatsiyasınıñ Litvaniyağa iş ziyareti programması çerçivesinde Meclis reisi Mustafa Cemilev oktâbr 21 künü Türkiyeniñ Litvaniyadaki Elçisi Akin Algan ile körüşti.

Türkiye Elçiliginde olıp keçken körüşüv devamında Avropa Komissarı Ştefan Füleniñ Ukraina ziyareti ve sentâbr 19 künü Meclis yolbaşçıları ile körüşüvinen bağlı meseleler muzakere etildi. Bunıñ kibi de taraflar Meclis reisi, Ukraina halq deputatı Mustafa Cemilevniñ Türkiye Baş Naziri Recep Tayip Erdoğan ve Türkiye Tış işleri naziri Ahmet Davutoğlunen ayrıca oktâbr 11 künü Anqarada körüşüvleriniñ neticelerini de muzakere ettiler.

Türkiyeniñ Litvaniyadaki Elçisi Akin Algan Türkiye ve Ukraina Tış işleri nazirleri, Qırım baş naziri Anatoliy Mogilöv ve Meclis reisi iştirakinde qırımtatarlarnıñ meselesine bağışlanğan 4 taraflı körüşüvniñ 2-nci raundı keçirilmek kerekligine yüksek qıymet kesti. Akin Algannıñ fikirince bu körüşüv 2014 senesi ocaq ayında Kiyevde OSCE azaları olğan devletlerniñ baş nazirleri körüşken vaqtında keçirilmesi mümkün.

Körüşüv soñunda Türkiyeniñ Litvaniyadaki Elçisi Akin Algan Meclis delegatsiyasına Litvaniyada mahsuldar çalışmaq tilegini bildirdi.

Körüşüvde Meclis tışqı alâqalar bölüginiñ başı Ali Hamzin, Litvaniya tatarları cemiyetiniñ başı, Meclisniñ Litvaniyadaki temsilcisi Adas Yakubauskas ve Ukraina halq deputatı Mustafa Cemilevniñ iqtisadiy meseleler boyunca yardımcısı Rustem Ümerov iştirak ettiler.