Türkiyede qırımtatar halqı soyqırımı qurbanlarınıñ hatırası añıldı

18 May 2013

2013 senesi mayıs 18 İstanbulda Ukraina baş konsullığı binasınıñ qarşısında qırımtatar halqı tarihiy Vatanı Qırımdan sürgün etilgeniniñ 69 yıllığı munasebetinen miting ötkerildi.

Tedbirni Türkiye Qırım derneginiñ İstanbul şübesi teşkilâtlandırdı. Bu aqta İstanbul Qırım türkleri medeniy ve yarlımlaşma derneginiñ başı Celâl İçten bildirdi.

500 insan iştirakinde keçken miting qırımtatarlarnıñ milliy gimni ve Türkiye Cumhuriyetiniñ devlet gimninden başlandı.

İstanbul Qırım türkleri medeniy ve yardımlaşma derneginiñ başı Celâl İçten qırımtatarlarnıñ Ukraina akimiyeti ögünde qoyğan talaplarnı oqup eşittirdi:

– qırımtatarlar aqlarınıñ qorçalanmasını teminlemek;

– qırımtatar halqınıñ Ukrainada telükesizligini ve inkişaf etmesini teminlemek, aqlarını qorçalamaq içün OSCE qoltutuvında Halqara forumnı 2014 senesiniñ soñuna qadar keçirmek;

– oquv müessiselerinde qırımtatar tilinde oquvnıñ inkişaf etmesine qoltutmaq, qırımtatar tilinde Qırımda resmiy til statusını bermek;

– sürgünlik yerlerinde qalğan qırımtatarlarnı Qırımğa qaytarmaq, qaytqanlarnı ise topraqnen teminlemek;

– akimiyet organlarından qırımtatarlarnıñ işten boşatılmasını toqtatmaq;

– Qırımtatar halqı Qurultayınıñ icra organı olğan Milliy Meclisni tanımaq;

– 1944 senesi sürgünlikten soñ Qırımnıñ adları deñiştirilgen şeer ve köylerine tarihiy adlarını qaytarmaq;

Bütün bu talaplar yazma şekilde Ukrainanıñ İstanbuldaki Baş konsullığına berildi. Konsullıqnıñ yanına “Unutmadıq, unutmaycamız ve unuttırmayacamız” degen sözler yazılı gülçember qoyuldı.

Bunıñ kibi de 1944 senesi sürgünligi qurbanlarınıñ ruhuna dua oquldı. Matem mitingi iştirakçileri Konsullıqnıñ binasından ta demiröl vokzalına qadar yürip bardılar ve anda da çeçek qoydılar.