Türkiye yañılanğan Ukrainağa er taraflı yardım köstermege azır

23 Fevral 2014

2014 senesi fevral 22 künü Ukraina Yuqarı Şurasında ukrain parlamentiniñ yañı spikeri Aleksandr Turçinov Türkiyeniñ yaqında akkreditatsiya etilgen Toluvekâletli ve Vefqulade Elçisi Yonet Can Tezel ile körüşti.

Körüşüvde Ukraina halq deputatı Mustafa Cemilev iştirak etti.

Türkiyeniñ Ukrainadaki Elçisi Yonet Can Tezel Ukraina Yuqarı Şurasında ukrain parlamentiniñ yañı spikeri Aleksandr Turçinovğa Ukraina içün böyle bir mürekkep vaqıtta ve pek meşğul olğanına baqmadan spiker olaraq saylanğanınıñ birinci kününde qabul etkeni içün teşekkür bildirdi.

Yonet Can Tezel Türkiye Ukrainağa bugünki qıyınlıqlarnı atqaruvda, demokratik aqları içün Maydanda turğan ve uquqoruv organlarınen çatışmada zarar körgen yüzlernen iştirakçilerine tibbiy yardım köstermege azır olğanını söyledi.

“Bizim yardımımız Türkiyeden zarur ilâc ve aletlerni yetkizüv, ağır yaralılarnı Türkiyeniñ tibbiyat müessiselerine yollamaq içün mahsus uçaqlarnı temin etüvden ibaret”, – haber etti Türkiyeniñ Ukrainadaki elçisi.

Öz nevbetinde Ukraina parlamentiniñ spikeri Aleksandr Turçinov Ukraina bugün kerçekten de kergin künlerni yaşağanını ve bugünki şaraittte Prezident saylanmasına qadar o, bir vaqıtta em parlament spikeri vazifesini, em icra akimiyetni idare etmege mecbur olğanını qayd etti. “Ukrainanıñ strategik ortağı olğan Türkiye ile sıqı bağlarnı daa da pekitmek pek müimdir”, – dedi spiker A. Turçinov.

Ukraina Yuqarı Şurasınıñ reisi Türkiyeniñ Elçisi Yonet Can Tezel ile körüşüvniñ teşebbüsçisi olğan halq vekili Mustafa Cemilevge de teşekkür bildirdi.
Körüşüv devamında bunıñ kibi de eki memleket arasında bugünde-bugün 6,5 milliard dollarnı teşkil etken ticariy-iqtisadiy munasebetlerniñ kölemini arttırmaq istiqballerini muzakere ettiler.