Türkiye prezidenti Zelenskıyğa Celâlnı qaytarğanı içün teşekkür bildirdi

12 Iyül 2024

Vaşingtondaki NATO sammitinde Türkiye prezidenti Recep Tayyip Erdoğan, ukrain işdeşi Volodımır Zelenskıynen körüşti.

“Prezident Erdoğan, bizim insanlarımıznı evge qaytarmağa yönelgen Ukrainanın ğayretlerini qayd etti. Ayrıca qırımtatarlarnı evge qaytarğanını qayd etti ve bu ğayretlerimiz içün teşekkür bildirdi. Men Prezident Erdoğannı inandırdım ki, bizim taqımımız böyle çalışmağa devam etecek”, – dep Zelenskıy Telegram kanalında yazdı.

O qoştı ki, “Barışıq sammiti”niñ qararlarını yerine ketirüv çerçivesinde Ukraina ve Türkiye, aşayt havfsızlığı ve deñizcilik azatlığına bağışlanğan konferentsiyanı keçirmege planlaştıralar, dep Qırım.Aqiqat haber berdi.

Türkiye prezidentiniñ kommunikatsiya bölüginiñ bildirgenine köre, körüşü vaqtında “rus-ukrain cenki, bölge ve cian meseleleri” muzakere etildi.

Erdoğannıñ sözlerine köre, “Cenkni adaletli şekilde bitirmek içün Türkiye ğayretlerini köstermege devam ete” ve “barışıq içün temel qoymaq maqsadınen ortaqlıq kibi er bir teşebbüske azır”.