Türk dünyası büyük coyuqqa oğradı

23 November 2012

22-noyabr gecesi İstanbulda 74 yaşında Türk Dünyası araştırmalar  Vakufınıñ Başı professor, doktor Turan Yazğan vefat etti. Bundan daa eki kün evelsi Aqmescitte İ. Gaspralı adına milliy kütüphanede Qırımtatar qadın-qızlar birligi tarafından Turan Yazğannıñ qırımtatar medeniyeti inkişafına qoşqan issesini aydınlatqan ve dostumızğa teşekkür olaraq azırlanğan filmniñ taqdimnamesi ötkerilgen edi. Teessüf ki, filniñ sebepçisi ve qaramanı onı körüp olamadı. Türk Dünyası araştırmalar  Vakufı bu dünya içün çoq ağır bir devirde -1980 senesi quruldı. Bu vaqıt içinde Vakuf 300-den ziyade kitap, ekseriyetle türkiy tilli halqlarınıñ edebiyat yadikârlıqlarını  çıqardı. Yüzlernen emiyetli neticelerge ketirgen salmaqlı tedbirler ötkerildi.  Turan Yazğan 1938 senesi İspartanıñ Egirdir rayonında doğdı. 1955 senesi litseyni bitirgen soñ İstanbul universitetiniñ iqtisadiyat fakultetine kire ve dört yıl keçerek, onıñ mezunı ola. Zenaatı boyunca devlet qurumlarında mesülietli vazifelerde  çalışa. 1963 senesi tecribe almaqçün onı İtaliyağa yollaylar. 1966 senesi universitette iqtisadiyat fakultetiniñ ocası ola, bir yıldan soñ bu saa boyunca doktorlıq dissertatsiyasını muvafaqiyetli qorçalay. Ocalıq ve ilim faaliyetini ameliy işlernen beraber becermekte. 1979 senesi professor ola. 2000 senesi nefaqağa çıqıp, faaliyetini bundan 20 sene meydanğa ketirilgen Türk Dünyası araştırmalar  Vakufında devam ete. Türkiye ve Türk dünyasındaki hızmetleri içün bir sıra universitetler onı fahriy doktor unvanı ile taqdirlediler.  Turan Yazğan hatıramızda milletperver ve alicenap insan olaraq  daima yaşacaq. Onıñ yaqınlarına, aqrabalarına teren taziye bildiremiz ve baş sağlığı tileymiz.

 Merhum Allanıñ rahmetinde bulunsın.

Milliy Meclis azaları