Türkiye Qırım işğalini tanımağanını ve Ukrayina topraq bütünligine qoltutqanını tasdıqladı

16.03.2026

Türkiye Tış işler nazirligi, 2014 senesi saban ayınıñ 16-nda yarımadanıñ Rusiye işğali vaqtında Qırımda keçirilgen qanunsız “referendum”nıñ on ekinci yıllığı munasebetinen beyanatnı derc etti.

Beyanatta qayd etildi ki, Türkiye Qırım işğalini tanımay ve Ukrayinanıñ suvereniteti ve topraq bütünligine öz deñişmez destegini tasdıqlay.

“Qanunsız referendum neticesinde Qırım Muhtar Cumhuriyetiniñ Rusiye Federatsiyası tarafından ilhaqınıñ on ekinci yıllığında halqara uquqqa zıt kelgen bu vaziyetni tanımaycağımıznı daa bir kere tasdıqlaymız. Ukrayina mustaqilligi, suvereniteti ve topraq bütünligine qoltutqan devletimiz yarımadada olıp keçken adise-vaqialarnı – ilk evelâ qırımtatar halqınıñ vaziyetini – diqqatnen taqip etmege devam etecek ve bu meseleni kün tertibinde tutacaq”, – dep beyanatta qayd etildi.

Qırımtatar Milliy Meclisiniñ reisi Refat Çubarov bu nazar noqtasına quvanıp, Türkiyeniñ Ukrayinağa destek köstergeni içün teşekkür bildirdi.

“Qırım Muhtar Cumhuriyeti ve Aqyar şeeriniñ Rusiye Federatsiyası tarafından işğaliniñ on ekinci yıllığı munasebetinen Türkiye Cumhuriyeti Tış işler nazirliginiñ beyanatına quvanamız. Türkiye Cumhuriyeti ve türk halqına Ukrayinanıñ suvereniteti ve topraq bütünligine qol tutuv siyaseti içün teşekkür bildiremiz”, – dep Refat Çubarov qayd etti.

O, Türkiyeniñ Rusiye işğali şaraitinde qırımtatar halqınıñ vaziyetine diqqat etkeni ve onı qorçalamaq içün yapqan ğayretleri içün ayrıca minnetdarlığını bildirdi.