Trakayda «Qarlı körüşüv» iştirakçilerine resmiy şekilde Ukrainada qırımtatarlarnıñ vaziyeti aqqında muracaat berildi

14 Yanvar 2014

2014 senesi yanvar 9 künü Qırımtatar halqı Meclisiniñ Litvaniyadaki temsilcisi Adas Yakubauskas Liitvaniya Tışqı işler nazirliginde bulunıp, Litvaniya Tışqı işler naziriniñ mesleatçısına Meclis temsilciligi adından Trakay şeerinde ekspertler ve strateglerniñ “Qarlı körüşüv” adlı halqara körüşüv iştirakçilerine muracaatnı berdi.

Bu sene halqara tedbirde belli çetelli ve litvaniyalı siyasetçiler, çinovnikler ve ekspertler, cümleden Estoniya, Romaniya, Slovakiya, İsveçre tışqı işler nazirleri, AQŞ devlet kâtibiniñ avropa ve avroasiya işleri muavini, NATOda Avropa Birligi baş kâtibiniñ muavini, NATO mütehassısları, Şimaliy ve Baltıq devletleri halqara analitik ve tedqiqat merkezleriniñ hadimleri iştirak ettiler.

Meclis temsilciligi bergen muracaatta qırımtatar halqınıñ Ukrainada vaziyeti talil etilgen.

Malümat içün: “Qarlı körüşüv” – Litvaniya Tışqı işler nazirligi teşkilâtlandırğan ananeviy halqara körüşüvdir. Tedbir iştirakçileri 2014 senesi telükesizlik siyaseti meselelerini, NATOnıñ sammiti, Vilnüs sammitinden soñ Avropa Birliginiñ şarqiy ortaqlıq meseleleri muzakere etildi. Soñki mesele munasebetinen tedbirge Ukrainada muhalifet areketiniñ yetekçilerinden biri, Ukraina halq deputatı Pötr Poroşenko keldi.