Til – halqlar arasında muabbetlik köpüridir

22 November 2012

Bağçasaraydaki tarihiy-medeniy zapovednikniñ hadimleri endi 5 afta devamda qırımtatar tilini ögreneler.  Hansaray müzeyi hadimleri içün  qırımtatar tili kurslarını zapovednik memuriyeti teşkil etti.

Til kurslarınıñ oca ve talebelerine “Maarifçi” Assotsiatsiyası tarafından mahsus azırlanğan oquv qullanmaları bağışlandı.

Qadimiy Bahçasaraynıñ yüregi olğan Hansarayda çalışqan hadimler endiden soñ bizim ana tilimizde de laf etecekler. Bağçasaray tarihiy-medeniy zapovednigi devlet müzeyinde çalışqan çeşit milletlerge mensüp hadimler, Qırım toprağı tamır halqınıñ tilini ögrenmeli, degen teşebbüsnen zapovednik müdir muavini Vadim Martınük çıqtı. Çünki bu insanlar qırımtatar tilini ögrenüvnen bir sırada, halqnıñ tarihı, medeniyeti, sanatı, urf-adetlerinen daa yaqın tanış olacaqlar, dey o.
   
Eki afta evelsi öz işini başlağan qırımtatar tili kurslarında bugün artıq 5-nci ders keçmekte. Amma az vaqıt keçkenine baqmadan, kurs talebeleri qırımtatar tilinde laf etip başladılar. Alğan  bilgilerimiz bizni  ğayet ruhlandıra, çalışqan saamız boyunca zengin malümat elde etemiz ve ögümizde yañı imkânlar açıla, dep quvançlarınen paylaşalar.

Bundan 22 yıl evelsi Bağçasaray mektebinde qırımtatar tili ve edebiyatı derslerini berip başlağan ve bu keçken yıllar içersinde büyük tecribe saibi olğan Elvira oca İbraimova şimdi açılğan kurslarda çalışa, oca öz talebelerinden ğayet memnün. Onıñ interaktiv usulında keçirgen dersleri eyi neticeler bere. Kurs diñleyicileri tarafından azırlanğan ve musafirlerge numayış etilgen sanalaştırma buña isbat ola bile.
   
Bağçasaray tarihiy-medeniy zapovednikte qırımtatar tili kursları çalışıp başlağanını eşitken Qırım Yuqarı Şurasınıñ deputatı, Milliy Meclis medeniyet ve tasil idaresiniñ reberi, “Maarifçi” Assotsiatsiyasınıñ reisi Safure Kacametova “Maarifçi” Assotsiatsiyası  tarafından mahsus qırımtatar tili kursları diñleryicileri içün çıqarılğan bütün oquv qullanmalarını taqdim etti. Oquv qullanmalarınen beraber, kurslar ocasına, müzeyniñ er bir bölügine üç tilli ve terminler luğatlarını da bağışladı.

Talebelerine ana tilimizni kiril ve latin elifbeleri vastasınen ögretken Elvira oca, tilni zayıf bilgen ve asla da bilmegenler içün bu qullanmalar pek kerek olğanını aytıp, öz minnetdarlığını bildirdi.
 
Niyetlerine irişe başlağan til kurslarınıñ teşebbüsçisi, ocası ve cemaatçılar Hansarayda ukrain, rus tillerinen birlikte, qırımtatar tili de serbest yañğıraycağına quvanalar. Çünki olar til çeşit milletler arasında añlaşuv, yaqınlıq, barışuv, muabbetlik, dostluqnıñ eñ qaviy köpüri olğanına eminler.