Tigipko Qırımtatarlarnı yerleştirüv Programmasını ğayrıdan baqmaqnı işşçandırdı

10 Oktâbr 2011

Tigipko Qırımtatarlarnı ve diger sürgün etilgen adamlarnı 2015 senesine qadar yerleştirüv Programmasınıñ bütün maddelerini baqıp çıqacaq ekspert gruppasının meydanğa ketirmek maqsadındadır.

Qırım Yuqarı Şurasınıñ matbuat merkezi haber bergenine köre bu aqta Qırım Yuqarı Şurasınıñ Milleitlerara munasebetler ve sürgün olunğan grajdanlarnıñ işleri boyunca daimiy komissiya reisi Remzi İlyasov Qırımdaki milliy-medeniy cemiyetler vekillerinen körüşüvde bildirdi.

Baş mevzusı milletlerara barışıqlıq meselesi olğan işbu körüşüvde Ukraina Prezidenti Qırımdaki Daimiy temsilcisiniñ muavini İbraim Mamutov, Qırım milletlerara munasebetler ve sürgün etilgen insanlarnıñ meseleleri boyunca cumhuriyet komiteti reisiniñ muavini Emine Avamileva da iştirak ettiler.

Parlament komissiyasınıñ toplaşuvını açqan R.İlyasov bulunğanlarnı Ukraina içtimayi siyaset naziri Sergey Tigipko ile subetiniñ neticeleri boyunca esabat berdi.

İlyasovnıñ aytqanına köre, körüşüvde qırımtatarlarnı ve diger millet vekillerini yerleştirüv programmasını finansirlev meselesi baqılğan.

Komissiya reisi şunı da qayd etti ki, körüşüv vaqtında Baş nazir muavininiñ diqqatını devletniñ kelecek sene büceti işlengende cumhuriyetniñ qırımtatarlarnı ve diger sürgün etilgen insanlarnı yerleştirüv programmasını finansirlev qısmına ait itiyacları esapqa alınmağanına celp etken.

“2011 senesine Ukraina Devlet büceti aqqında” Ukraina Qanunı boyunca qırımtatarlarnı yerleştirüv programmasına 23,3 million grivnâ ayırmaq planlaştırılğan edi. Bu munasebetler ile Qırım Yuqarı Şurasınıñ deputatları Ukraina Prezidenti, Ukraina baş nazirine 2010 senesi dekabr 22-de ve 2011 senesi mayıs 18-de muracaatta bulunıp, programmanıñ müddetini 2015 senege qadar uzatqmaq ve devletniñ bu saağa sermiyalarını iç olmağanda 87 millionğa arttırmaqnı rica ettiler .

R. İlyasovnıñ aytqanına köre 2012 senesine maqsadlı sermiyalar ayıruv meselesini Qırım Yuqarı Şurasınıñ reisi Vladimir Konstantinov da Ukraina Yuqarı Radasınıñ reisi Vladimir Litvin uzurındaki Konsultativ keñeş toplaşuvında kötergen S. Tigipko ile körüşüv devamında 2015 senesine Sürgün etilgen qırımtatarlarnı ve diger milletlerni yerleştirüv programmasınıñ qabul etilüv meselesi de baqılğan. Mezküp meseleniñ muzakeresi vaqtında Tigipko körüşüvde köterilgen bütün meselelerni şahsen nezaret etecegini bildirdi.

Bundan da ğayrı, R. İlyasov Qırım cumhuriyet milletlerara munasebetler ve sürgün etilgen grajdanlarnıñ işleri boyunca komitetniñ reisi Eduard Dudakovnıñ 2012 senesine plan leyhasını işlev ve ağımdaki senede finansirlevni başlav saasındaki mahsuldar işini ayrıca qayd etti.

Qırım milletlerara munasebetler ve sürgün etilgen insanlarnıñ meseleleri boyunca cumhuriyet komiteti reisiniñ muavini Emine Avamileva körüşüv iştirakçileriniñ diqqatına Qırım Muhtar Cumhuriyetinde milletlerara barışıqnı teminlev ve medeniy munasebetler köntseptsiyasınıñ leyhasını avale etti.

Munaqaşa devamında körüşüv iştirakçileri mezkür vesiqa boyunca fikir-mulâazalarını bildirip, onı mükemmelleştirüv boyunca bir sıra teklif kirsettiler.