Temsil etilmegen halqlar ve milletler teşkilâtı Prezidiumınıñ XV toplaşuvı

11 July 2013

Ukrainanı Qırımtatar halqınıñ öz Vatanında aqlarını ğayrıdan tiklev, havfsızlığını ve inkişafını teminlev meselesi boyunca halqara forum keçirmege çağıramız. Ukrainanıñ tamır halqı olğan Qırımtatar halqı 1944 senesi Sovetler birligi tarafından sürgün etilip, onlarnen yıllar sürgünlik yerlerinde zorluqnen tutulğan soñ öz Vatanına qayttı.

Tarihiy Vatanına qaytqanından yigirmi yıldan berli qırımtatarlarnıñ Qırımda aqlarınıñ ğayrıdan tiklenmegenini esapqa alaraq biz qırımtatar halqınıñ Ukrainada aqlarını tiklev meselesinde Ukrainağa halqara cemaatçılıq yardım etmesi kerek, dep sayamız.

Qırımtatar halqınıñ Ukrainada aqlarını tiklev meselesinde Ukrainağa yardım etmek maqsadında Milliy Meclis halqara forumnı keçirüv teşebbüsinen çıqtı. Eki yıl evelsi Qırımtatar halqınıñ Meclisi Halqara forum keçirmek teşebbüsinen çıqqanda buña qoltutqanlarını Avropa Birligi devletleri, Amerika, Kanada, ve Türkiye bildirdiler.

OSCE milliy azlıqlarnıñ işleri boyunca aliy komissarınıñ ofisi Halqara forumnı keçirüv boyunca planı işlep Ukraina ükümetine taqdim etti.

Biz inanamız ki, mezkür teşebbüs qırımtatar halqınıñ siyasiy, iqtisadiy ve medeniy aqlarını tiklev, yerleştirüv meselelerini çezüvniñ yolu ve usullarnı araştıruvda yapılğan ameliy bir adımdır. Ukraina ükümeti forum keçirmek müddeti ve formatını belgilev işini esasssız sozğanı bizni pek raatsızlay.

OSCE milliy azlıqlarnıñ işleri boyunca aliy komissarı Knut Vollebekniñ teşebbüsine qoltutaraq biz halqara cemaatçılıqnı Ukrainağa Qırımtatar halqınıñ aqlarını tiklev meselesi boyunca halqara forum keçirüvde yardım etmege çağıramız.