“TCS-2011” Qırımda

27 Mart 2011

Aprel 20-25 künleri Qırımda “TCS-2011” programması boyunca Türkiyede oqumaq içün gençlerni seçip almaq niyetinen sınavlarnı azırlav ve ötkerüv boyunca komissiya çalıştı.

Komissiyanıñ erkânına Milliy Meclis azası, “Maarifçi” ocalar assotsiatsiyasınıñ reisi S. Kacametova Türkiye tasil Nazirliginiñ aliy oquv yurtları idaresiniñ temsilcisi Fürüzan Özçelik, Türkiye tasil Nazirliginiñ vekili Rüştü Gedik, sınavlar ve studentlerni Türkiyeniñ aliy oquv yurtlarına taqsim etüv merkeziniñ vekili Turay Karadere, Türkiye naztrler kabineti yanında yaqında meydanğa ketirilgen türkiy halqlarnen bağ tutuv idaresi Yeliz Öz ve Zahide Erbilli ve Türkiye Tış işleri Nazirliginiñ temsilcisi Reyhan Qalqay ve içki işler Nazirliginiñ vekili Fatih Balcı.

2011 senesi Türkiye bücetinden para ayırılğan “Büyük studentlik leyhası” çerçivesinde aprel 24 künü sınavlar 12 memlekette ötkerildi.

Qırımda “TCS-2011” sınavları “Maarifçi” qırımtatar ocalar assotsiatsiyasınıñ qoltutuvı sayesinde ve Milliy Meclisniñ reberligi altında amelge keçirildi. S. Kacametovanıñ bildirgenine köre, sınavlarda iştirak etmek içün arizalar on-layn vastasınen aprel 8-ge qadar qabul olundılar. “Vaqıt az ayırılğanı sebebinden istegenlerniñ episi bu imkândan faydalanıp olamadılar, Türkiyeniñ 8 büyük universitetlerinde cumhuriyet tarafından ayırılğan 30 oquv yerine 53 ariza keldi, olardan 50 genç testlerden keçmege lâyıq dep tanıldı.

Sınavlar keçken soñ komissiya azalarını qabul etken Milliy Meclis reisi M. Cemilev, Türkiye cumhuriyetiniñ maddiy qoltutuvı sayesinde ötkerilgen TCS sınavları qırımtatar gençleri arasından ihtisaslı ve raqiplikke iqtidarlı mütehassıslarnı azırlavda pek müim olğanını qayd etip, musafirlerge hatıra bahşışları bağışladı.

Milliy Meclisniñ medeniyet ve tasil idaresi ve “Maarifçi” assotsiatsiyası komissiya azalarını qabul etüvde yardım etken Türkiyeniñ Qırımdaki Fahriy Konsulı Seyran Osmanovqa, TİKAnıñ Temsildisi Ahmet Çinarğa, QYUŞânındaki milletlerara munasebetler ve sürgün olunğan grajdanlarnıñ işleri boyunca daimiy komissiyasınıñ reisi Remzi İlyasovqa, Reskomnatsnıñ reisi Edem Dudakovqa ve Qırımda “Çağ ögretim işlemleri” firmasınıñ vekili Sait-Enver Yıldızğa minnetdarlıq bildireler.