Tarhankutlılar körüştiler

25 Iyün 2012

2012 senesi iyün 24-te doğma Aqmeçit rayonı Bay-Qıyat, Qırğız-Qazaq, Camal, Otuz, Toq-Col, Tuvaqa köyleriniñ sakinleri Çernomorskoye qasabası Medeniyet evinde körüştiler.

Tedbirniñ teşkilâtçıları musafirlerni ananeviy qave ile qarşıladılar. Tarhankut yarımadasınıñ köylerinden çıqqan adamlar körüşüvge Qırımnıñ Aqmescit, Qarasuvbazar, Kefe, Qurman, Or qapı, Pervomay, Aqşeyh rayonları, Ermeni bazar, Saq, Melitopol şeerlerinden keldiler.

Yağğan küçlü yağmur ve şiddetli ruzgâr bile körüşüv quvançını eksiltip olamadı. Köydeşler tedbirniñ resmiy qısmı başlmazdan bayağı evel bir-birlerinen toya-toya laf ettiler, hatırlaştılar. Yorğun bilmez Kevser hanım ketirgen yañı kitaplarnı satın aldılar. Qırımtatar sanat müzeyi sergilegen işlemelerni seyir ettiler. Çünki Qırımnıñ çöl taraflarında böyle körüşüvler siyrek ola.

Tedbirniñ teşkilâtçıları salonda yarıq berilmesini beklemeden körüşüvni mum çıraqlar ışığında başladılar. Adeti üzre dua oquldı, onı Aqmeçit rayon musulmanlarınıñ imamı Löman Abduramanov alıp bardı, tedbirniñ tantanalı qısmını ise belli qırımtatar şairi, Ukraina yazıcılar birliginiñ azası Şeryan Ali alıp bardı.

Köydeşlerni Aqmeçit rayon devlet memuriyeti reisiniñ birinci muavini S Damir İbadullayev, regional meclis reisi Şevket Smailov ve Milliy Meclis Prezidiumınıñ azası, “Maarifçi” birleşmesiniñ reisi Safure Kacametova selâmladılar. Bundan soñ Tarhankut köyleriniñ qart sakinlerine bahşışlar berilip, Hayruddinov M.A., Abduramanov A., Hayruddinova E.M. “Derevni Tarhankuta” kitabınıñ taqdimi oldı.

Taqdimnameni kitapnıñ müellifi, pedagogika ilimleri doktorı Muyedin Hayruddinov alıp bardı. “Keçmişni unutqannıñ kelecegi yoqtır” degen atalar sözlerini aqılımızda tutaraq, biz başta beş köyniñ tarihını yazmaq qararına keldik. Bu şimdilik bir tamçı. Qudretli Qırım çölüniñ er bir köşesinde camilerniñ beyaz minareleri kökke yükselip, ezannıñ tatlı sesi ve baldan tatlı qırımtatar tili yañğıray edi, – dedi kitap müellifi Muyedin Hayruddinov.

Muyedin Hayruddinov ikâye etkenine köre, Qırım hanlığı devrinde Tarhankut köylerinde dindarlarnıñ vaquf topraqları mücessemleşken. Topraq saipleri olğan din hızmetçilerine olarnı vergiden azat etken tarhan (imtiyazlı) yarlıqları berilgen. İşte, şunıñ içün de Qırımnıñ bu qadılığına Tarhan degenler.

Bay-Qıyat, Qırğız-Qazaq, Camal, Otuz, Toq-Col, Tuvaqa köylerinden künümizde belli cemaat ve ilim erbapları, çeşit saalarda itibar qazanğan mütehassıslar çıqtı. Olarnıñ arasında milliy areket iştirakçisi, uquqqoruyıcı Zampira Asanova, Meclis Maarif ve medeniyet idaresiniñ başı, “Qırımda hızmet köstergen maarif hadimi” Safure Kacametova, Qurultay delegatı, Aqmeçit rayon devlet memuriyeti reisiniñ birinci muavini Damir İbadullayev, belli yazıcı ve şair Şeryan Aliyev,ekinci Qurultay delegatı, biologiya ilimleri namzeti, Qazahstan İlimler Akademiyası Eksperimental biologiya İnstitutınıñ ilmiy hadimi Arif Abdurahmanov, Qırımda hızmet köstergen maarif hadimi, KRİPPO kafedra müdiri, pedagogika ilimleri doktorı Muyedin Hayruddinov ve daa çoqları.

300-den ziyade köydeş toplanğan körüşüv “Çernomorneftegaz” raatlıq bazasında pişirilgen lezetli pilâv ve “Ağır ava ve Qaytarma” oyunınen yekünlendi. Bayramğa çevrilgen tedbirni “Aqmeçit” rayon folklor çalğı taqımı yaraştırdı.