Sürgünlikniñ 69 yıllığı munasebetinen «Alraid» birleşmesiniñ qırımtatar halqına muracaatı

18 May 2013

Aziz qardaş ve apteler!
 

Bugün qırımtatarlar halqı öz tarihiy vatanından sürgün etilgeniniñ qara künüdir. Qırımtatarlar deşetli azaplarğa oğratıldılar, amma olar ölmediler, öz iradesi ile medeniyeti, tili ve yurtuna sevgini saqlayabildiler.

Qırımtatarlarnıñ Qırımğa qaytmaq oğrunda yıllarca devam etken küreşinde onıñ liderleri metanet, irade nümünesi kösterdiler. Olarnıñ bu areketine ukrain ve sabıq sovetler devletiniñ diger halqlarınıñ eñ ileri vekilleri qoltuttılar. Qırımtatarlar tarihiy variyetiniñ bayağı qısmı yoq etilgenine baqmadan iradeli halqıñız medeniy ve diniy degerliklerini tikley, tili, milliy tasil ve medeniyetini ğayrıdan canlandıra.

Bugün qırımtatar halqınıñ ögünde mürekkep meseleler tura. Elbette bu ilk-evelâ bazı küçlerniñ halqnı bölmek areketlerinen bağlıdır. Alternativ diniy ve milliy-medeniy merkezlerni quruvnen bu küçler yarımadada kergin bir vaziyetni meydanğa ketirmek, qavğa çıqarmaq peşindeler.

Siziñ ikmetli halqıñız özüniñ maneviy ve teşkilâtiy birligini saqlaycağı, öz yurtunda aqlarınıñ tiklemesine irişecegine inanamız. Öz nevbetinde Qırımtatar halqı Meclisi yolbaşçılarınıñ mesülietligi doğru qararlarnı alıp, Qırımda siyasiy-içtimaiy stabillikni pekitüvge imkân yaratırlar.

Biz daima siznen beraber ve siziñ dostuñız olmaqnı devam etermiz, degen sözlerni qırımtatar qardaşlarımızğa daa bir kere aytmaqnı borcumız, dep sayamız.
Yüce Rabbimizden qırımtatar halqına merhametlik tileymiz, sürgünlikniñ müşkül yıllarından soñra tuvğan topraqlarıñızda pekinmeñizge yardımcı olmasını yalvaramız. Allah sizlerge diniñiz, medeniyet, til ve adetleriñizni tiklevde sabır-taqat, küç-qudret bersin!

Allah epimizni ışıqqa doğru yol kösterip, Onıñ rizasına irişmemizde yardım etsin!

 

“Alraid” Bütünukrain cemaat teşkilâtlarınıñ birleşmesi