Sürgünlik qurbanlarınıñ hatırasına matem tedbirlerini azırlav ve keçirüv komitetiniñ toplaşuvı

14 May 2013

2013 senesi mayıs 14-te Aqmescitte Milliy Meclis reisininiñ birinci muavini Refat Çubarovnıñ reisiliginde ötkerilgen Sürgünlik qurbanlarınıñ hatırasına matem tedbirlerini azırlav ve keçirüv komitetiniñ toplaşuvında matem tedbirlerine azırlıq ketişatı muzakere etilip, tüzetüv ve añlaşma talap etken meseleler tafsilâtlıca baqıldı.

Refat Çubarov şu künü Qırım Nazirler şurasında Sürgünlik qurbanlarınıñ hatırasına matem tedbirlerini azırlav ve keçirüv komitetiniñ toplaşuvında o, ve Remzi İlyasov iştirak etkenini bildirdi. R. Çubarovnıñ aytqanına köre, mayıs 17 künü Qırım Nazirler şurası teşkil etecek hatıra aqşamında devlet, cumhuriyet ve qırımtatar milliy bayraqları olacağı közde tutulıp, aqşamda Meclis reisiniñ birinci muavini Refat Çubarov ve Qırım baş naziriniñ muavini Georgiy Psaröv çıqışta bulunacaqları belgilendi.

“Qırım İnformatsiya komitetine Qırım teleradiokanallarına mayıs 17-18 künleri yayınlar programması, 2013 senesi mayıs 18 saat 12-de olacaq “Qayğı ve Birlik daqqası”nı teşkil etmek boyunca tevsiyeler yollanılacaq, – dep haber etti R. Çubarov.

Qırımtatar halqınıñ Meclisi qararına binaen 2013 senesi yanvar 25-te tizilgen teşkiliy komitet azaları . mayıs 17 künü Aqmescitniñ merkeziy meydanında er sene keçirilgen “Qalbiñde ateş yaq”aktsiyasına azırlıq aqqında esabat diñlediler.Teşkiliy komitet azası E. Bariyev aytqanına köre aktsiya saat 20.00-de başlanıp, tedbir çerçivesinde qırımtatar sanatçıları Femiy Mustafayev, Aksana Ametova, “Hayat” gruppasınıñ icrasında milliy yırlar yañğıraycaq.

Tıpqı böyle tedbirler Qarasubazar, Aluşta, Sudaq ve Çernomorskoye qasabasında da olacaq.

Teşkiliy komitet toplaşuvında demiröl vokzalı ve Salğır bağçası yanındaki hatıra taşları yanında qaravullar qoymaq, sürgünlik qurbanlarına dua oqumaq kerekligi qayd etildi.

Aktsiya iştirakçileri Aqmescitniñ merkeziy meydanına taba mayıs 18 künü yürip kelecek kolonnalarnıñ marşrutını ve er bir kolonna içün mesülietlilerni tasdiqladılar ve bunıñ kibi de matem tedbirleri keçirilgen yerlerde tertip-nizam saqlanmasını teminlev aqqında ayttılar.