Sumedlâ Memedlâyev 100 yaşını toldurdı

26.01.2013

100 yaşını toldurğan Sumedlâ qartbabanı hayırlamaq içün Aqmescit şeer şurasında “Qurultay-Ruh” fraktsiyasınıñ deputatları Sadıh Tabah ve Seytumer Berberov, Aqmescit regional meclis reisi Lemmar Yunusov, Aqmescit şeer sağlıqlı saqlav merkeziniñ başı Vladislav Beliçenko, Aqmescit şeeri Kiyev rayon şurasınıñ vekilleri keldiler.

Aqmescit şeer şurasında “Qurultay-Ruh” fraktsiyasınıñ deputatları qartbabağa Meclis adından tozütar ve Ukraina Prezidenti Viktor Yanukoviçniñ adından hayırlav telegrammasını berdiler. Qırımtatar halqı Meclisiniñ reisi Mustafa Cemilev, şeer regional meclisi ve Aqmescit şeer şurasında “Qurultay-Ruh” fraktsiyasınıñ deputatları adından Sadıh Tabah Sumedlâ qartbabanı hayırlap, eñ eyi tileklerini bildirdi.

“100 yıl munasip ömür keçirmek – bu büyük bahttır. Böyle uzun hayat devamında qartababa pek çoq qıyınlıqlar, zorluqlar çekti. Böyle müteber yaşqa kirgen insanlar halqımız içün canlı tarihtır, olarnıñ qadirine yetmek, saymaq borclumız. Cenk, sürgünlikni körgen qartbaba kene Vatanına qaytıp, yaş nesilge ibret oldı. Hayırlı yaşlar olsun”, – dedi Sadıh Tabah.

Sadıh Tabah ve Seytumer Berberov Sumedlâ Memedlâyev kibi uzun ömür körgen qartlarnen qonuşmaqnı kendileri içün şeref, dep bilgenlerini qayd ettiler.

“Aqmescit şeer sağlıqnı saqlav idaresi adından sizni doğğan künüñiznen hayırlap, qaviy sağlıq tileyim”, – dedi Vladislav Beliçenko öz hayırlavında.
Sumedlâ qartbabanıñ aqrabaları ise musafirlerge teşekkür bildirip, asılında qartbaba 1912 senesi doğğanı ve 100 yaşını bıltır toldurıp, bu yıl ise 101 yaşına kirgenini ayttılar. Onıñ vesiqalarında 1913 senesi dep yañlış yazılğan.

Sumedlâ qartbaba da musafirlerge minnetdarlıq bildirip, er keske uzun ve bahtlı ömür tiledi.

Malümat:

Sumedlâ Memedlâyev 1913 senesi yanvar 26 künü Eski Qırımnıñ Çelebi-Eli köyünde dünyağa keldi. Ana-babasına yardım etmek içün 10 yaşından başta tütün tarlalarında, soñra dağ-himiya kombinatında çalışıp başlay. Cenk başlanğanda birinci künlerinden cebege kete ve yaralana.

Gospitalden çıqqan soñ komissiya onı arbiy hızmetke yaravsız, dep tanıy. 1944 senesi Sumedlâ Memedlâyev Kostroma vilâyetine yani Ural dağlarına sürgün etile.

1947 senesinden 1953 senesine qadar maden ocaqlarında çalışa. Bir qaç yıldan soñ kene sürgünlikke oğratılıp, Tacikistannıñ Duşanbe şeerine tüşe.

1997 senesi 84 yaşlı Sumedlâ qartbaba bala ve torunlarınen birlikte Qırımğa qayttı.