Süleyman Mamutov BTMnıñ Tamır halqları meseleleri daimiy forumınıñ maruzacısı olaraq yañıdan saylanıldı

21.04.2025

Çiçek ayınıñ 21-nde New-Yorkta BMTnıñ Tamır halqları meseleleri daimiy forumınıñ 24-nci sessiyasınıñ açılışı vaqtında Ukrayina ve Qırımtatarlarnıñ temsilcisi Süleyman Mamutov Daimiy Forumnıñ maruzacısı olaraq yañıdan saylanıldı.

Er yıl BMTnıñ Tamır halqları meseleleri daimiy forumınıñ azaları, yani er sessiyada,Rreis, reisniñ muavini ve maruzacıdan ibaret olğan büronı saylaylar. Süleyman Mamutov birinci kere keçken sene keçirilgen sessiyanıñ maruzacısı olaraq saylanıldı.

BMTnıñ Tamır halqları meseleleri daimiy forumı, bütün dünyada tamır halqları meselelerinen oğraşqan Birleşken Milletler Teşkilâtınıñ esas organıdır. O, er yıl toplaşıp, tamır halqlarınıñ meseleleri ve çağıruvlarını muzakere ete.

Forumnıñ esabatı/maruzaları BMTnıñ sisteması ve BMTnıñ aza devletleri içün tevsiyeler bere. Bu tevsiyeler em ayrı dünya vaziyetlerine – meselâ, uquq bozuluvları, – em de tamır halqlarınıñ siyasiy, medeniy ve diger kollektiv aqlarınıñ qorçalavınen bağlı daa umumiy meselelerge ait ola bilir.

Süleyman Mamutovnıñ añlatqanı kibi, maruzacınıñ vazifesi – Forumnıñ eki aftalıq işinde çıqış ve körüşüvler neticesinde toplanğan malümat esasında Daimiy Forumnıñ yıllıq esabatını azırlamaqtır.

“Maruzacı, bütün dünya bölgelerindeki vaziyetni aydınlatmaq kerek. Aynı zamanda maruzacığa öz bölgesinde tamır halqlarınıñ aqları vaziyeti aqqında malümatnı keniş cemiyetke bildirmek, Forumnıñ esabatına ve diger vesiqalarına kirsetmek imkânı berile. Evel, bizler Forumnıñ mütehassıs-azaları arasında temsil etilmegende, Forumnıñ resmiy vesiqaları Ukrayinanıñ tamır halqlarınıñ aqlarınen bağlı vaziyetni aydınlatmay edi”, – dep Süleyman Mamutov tarif etti.

Qırımtatar Milliy Meclisiniñ Reisi Refat Çubarov, Mamutovnıñ maruzacı vazifesine tayin etilmesini böylece izaatlardı:

“Süleymannıñ bu vazifege yañıdan tayin etilmesi – onıñ yüksek seviyeli ihtisaslığınıñ tanılması ve dünya tamır halqlarınıñ vekilleri tarafından Ukrayinağa ve toprağı rusiye duşmanı tarafından işğal etilgen tamır Qırımtatar halqına ürmet kösterilmesidir”.