Ştefan Füle: Halqara forumnı OSCE iamesinde 2014 senesi sürgünlikniñ 70 yıllığı arfesinde keçirilmesi mıtlaqa muzakere etilmesi zarur meseledir

19 Sentâbr 2013

2013 senesi Sentâbr 19 künü Qırımda Ukraina Tış işleri naziri Leonid Kojara, Qırım Nazirler Şurası ve Meclis yolbaşçılarınıñ Avropa Birliginiñ Kenişletüv ve Avropanıñ eyiqomşulıq siyaseti meseleleri boyunca komissarı Ştefan Füle ile körüşüvi olıp keçti.

Qırımtatarlarnıñ vekâletli organını Avropa Birligi komissarı Ştefan Füle ve Ukraina Tış işleri naziri Leonid Kojara ile körüşüvde Meclis reisi, Ukraina halq deputatı Mustafa Cemilev, onıñ birinci muavini Refat Çubarov, muavini Remzi İlyasov, Meclis Prezidiumınıñ azaları Ali Hamzin, İlmi Ümerov ve Safure Kacametova temsil ettiler.

Avropa Birligi tarafından körüşüvde Avropa Birliginiñ Ukrainadaki Vekâletlikniñ başı Yan Tombinski, Avropa Birligi vekâletliginiñ leyhalar reberi Entso Damianı, Ukraina ile munasebetler meseleleri boyunca mesül ekspert Kalin Ungur iştirak ettiler.

Şunı qayd etmeli ki, Komissar Ştefan Füle ve OSCE şimdiki reisi, Ukraina Tış işleri naziri Leonid Kojara ile körüşüvge davet etilgen OSCE Milliy azlıqlarnıñ işleri boyunca Aliy Komissar ofisiniñ başı İlze Brand-Kehris hanım ve ofisniñ üyken mesleatçıları Vinsent de Graaf ve Bobu Din cenaplarına tögerek masa başında yer tapılmadı.

OSCE hadimleri matbuat vekilleri içün qaldırılğan yerlerde oturmağa mecbur oldılar. Bundan da ğayrı, 3 saat devam etken körüşüvde OSCE hadimlerine çıqışta bulunmaq içün söz berilmedi.

Albuki olar OSCE Aliy Komissarı Knut Vollebek ofisi tarafından azırlanılğan “Evel sürgün etilgen şahıslarnıñ Qırımda, Ukrainada qatıluvı” maruzasınıñ tanıtımını yapacaq ediler. Qırım ükümeti protokolınıñ bu “diqqatsızlığınıñ” sebebi şunda ki, ükümet oña baqqan ve tek özlerini ya da pek sayılı teşkilâtını temsil etken cemaat teşkilâtlarını davet etti.

Ukrain tarafından körüşüvde Medeniyet naziriniñ birinci muavini Timofey Kohan, Qırım Baş naziri Anatoliy Mogilöv ve bunıñ kibi de Ukraina Prezidentiniñ Qırımdaki daimiy temsilcisi Viktor Plakida iştirak ettiler.

Körüşüvniñ başında tögerek masa etrafındaki subetniñ idarecisi Ukraina Tış işleri nazirliginiñ hadimi körüşüv iştirakçileri Sürgün etilgen qırımtatarlar ve diger millet vekillerini yerleştirüv programmasınıñ eda etilmesi, alışqanları ve ukrain cemiyetine qatıluvınen bağlı meseleler, qırımtatarlar sürgün etilgeniniñ 70 yıllığına bağışlanğan matem tedbirlerge azırlıq, bunıñ kibi de Ukraina ve Avropa Birliginiñ sürgünden qaytqan şahıslarnıñ ukrain cemiyetine qatıluvınıñ ketişatı muzakere etilecegini ilân etti.

Öz nevbetinde Avropa Birligi komissarı Ştefan Füle qayd etti ki, körüşüvniñ baş mevzusı elbetteki Meclisniñ Halqara forum keçirüv teşebbüsiniñ muzakere etilmesidir.

“Milliy Meclisniñ 2014 senesi Qırımtatar halqı sürgünliginiñ 70 yıllığı arfesinde OSCE imayesinde Halqara forum keçirilmesi boyunca teklifi bugünki tögerek masa etrafında mıtlaqa muzakere etilmesi zarur meseledir, – dedi körüşüv başında cenap Füle.

Avropa Birliginiñ komissarı Avropa Birligi ve OSCE endi yapılğan işke ve diger halqara teşkilâtlarğa esaslanaraqUkrainağa SSSRden asabalıq qalğan problemlerni çezüvde Ukrainağa yardım etebileceklerinde emin.