Türkiye universiteti ve Rus Evi teşkilâtı tarafından teşkil etilgen skandal seminar

18 February 2025

“Rusiye Evi” adlı teşkilât bazı memleketlerde casuslıq yapqanından şübeli sayılsa da, Türkiye paytahtındaki devlet universitetinen işbirlikte bir simpozium teşkil etmek imkânına saip olğanı şaşırta. Bu simpoziumda Sovet Rusiyesiniñ Ekinci cian cenki vaqtında türk halqlarına qarşı yapılğan genotsidler aqqında söz yürsetilecekmi? Qırımtatarlar, meshetin türkleri, qaraçavlılar, balkarlılarnıñ sürgünligi aqqındamı?”, – dep Dünya qırımtatar kongressiniñ İcra eyyetiniñ azası Tuncer Kalkay Ankaradaki Hacı Bayram Veli universitetinde “Ekinci cian cenkindeki Türkiye-Rusiye munasebetleri aqqında halqara simpozium”nıñ açılışı aqqında haberni izaatladı.

Qırımtatar Milliy Meclisiniñ azası, içtimaiy kommunikatsiyalar doktorı ve Şefika Gasprinskaya adına Halqara qadınlar birliginiñ reisi Gayana Yüksel, Türkiye universitetinde keçirilgen bu skandal seminarnı akademik platformalarnıñ gibrid cenkniñ teşviqatınıñ ve alıp barılması içün qullanıla bilgeniniñ daa bir misali olaraq adladı.

“Amma, epimiz bilemiz ki, universitetler tarihnı obyektiv olaraq ögrenmek kerekler, onı imperiya ikâyeleri ve tarihiy vaqia iştirakçileriniñ siyasiy baqışlarına uyğun olaraq yañıdan yazmamaq kerekler. Bu delillerniñ bozuluvı ilmiy munaqaşağa yardım etmey, siyasiy tesir aletlerini pekite. İlim Kremlniñ usullarına degil, kerçeklerge esaslanmalı”, – dedi Yuksel.

Meclis azası emin ki, böyle tedbirler tarihiy vaqialarnıñ tolu aydınlatıluvı ve olarnıñ zemaneviy kontekstke qıymet kesüvinen beraber kelmek kerek, çünki “XX asır – eki totalitar rejimniñ, natsizm ve kommunizmniñ devridir, demek ki, olardan birisiniñ cinayetlerini sustırmaq ya da küçlendirmek, şu cümleden türk halqlarınıñ (qırımtatarlar, türk-meshetinler, qaraylar, balkarlar ve ilâhre) repressiyaları ve sürgünligi telükeli bir manipulâtsiya sayıla”.

“Ne natsistlerniñ cinayetleri, ne de SSCBniñ kütleviy repressiyaları sessiz qalmalı. XX asırda türk halqlarınıñ sürgünligi – “tarihiy bir hususiyet” degil de, Şuralar Birliginiñ qavmiy siyasetidir, bunı obyektiv şekilde ögrenmek ve takbih etmek kerek, ve universitetler totalitarlıq qurbanlarınıñ hatırasını tarihtan silmemek içün mesüliyetlidir”, – dep yekünledi Gayana Yüksel.

Hatırlatamız ki, kiçik aynıñ 17-nde Ankarada Hacı Bayram Veli Universitetinde “Ekinci cian cenkinde Türkiye-Rusiye munasebetleri aqqında II. Halqara simpozium” açıldı. Bu tedbirniñ Rusiyeniñ Ukrainağa qarşı basqıncı cenki vaqtında keçirilmesi, Türkiyedeki qırımtatar cemiyetiniñ vekilleri arasında sert tenqitke oğradı.