Siyasiy mabüs Vladlen Abdulkadırovnıñ arqa ağrısınıñ küçü arttı

26 Sentâbr 2023

RFda maküm etilgen qırımtatar faalcisi Vladlen Abdulkadırovnıñ arqası ağırmağa başladı. Qırım.Aqiqat bu aqqında yazdı.

Siyasiy mabüsniñ apayı Gülzarnıñ uquq qorçalayıcılarğa añlatqanına köre, Novoçerkasktan RFdaki Lıpetsk vilâyetiniñ Yeltsideki 2. apishanege etap etilgen soñ ağrı peyda oldı. O tüşüne ki, bu, oñravlar arasındaki quyuldıq simptomıdır.

“Endi Novoçerkaskta onıñ arqası ağırmağa başladı, etap etilgen soñ ise buğavlarnen eşyalarnı alıp ketirmege mecbur olğan soñ ağrısınıñ küçü arttı. Apishanede oña rentgen yaptılar ve cerrahqa yolladılar. Cerrah, nevrolog ekiminden mesleat almağa ayttı, amma onen alâ daa körüşmedi”, – dep bildirildi.

“Qırım birdemligi”niñ yazğanına köre, dört kişilik kiçik kamerada Abdulkadırovnı tutalar, o bazıda, dininde yasaqlanğan aş aşamağa red ete.

2022 senesi mayıs ayında Rostov-na-Donudaki Cenübiy bölge arbiy makemesi, Hizb ut-Tahrir davasınıñ ekinci Aqmescit gruppasınıñ iştirakçileri olğan Tofik Abdulgaziyev, Vladlen Abdulkadırov, İzzet Abdullayev, Mecit Abdurahmanov ve Bilâl Adilovğa üküm çıqardı. Ceza müddetleri – 12-14 sene.