Siyasiy mabüs Rustem Osmanovnı Ukrainağa qarşı cenkleşmege mecbur eteler – uquq qorçalayıcılar

13 Yanvar 2023

_{Foto: Qırım uquq qorçalayıcı gruppası}

Rus Ulyanovsk şeerindeki müstemlekede qırımlı siyasiy mabüs Rustem Osmanovnı rf vatandaşı olmağa ve Ukrainağa qarşı cenkleşmege mecbur eteler.

«Qırım uquq qorçalayıcı gruppası» bu aqqında haber berdi.

– Çelebicihan batalyonında sanki iştirak etmesi içün 6 senege maküm etilgen qırımtatar Rustem Osmanov şu anda rus Ulyanovsk şeerindeki müstemlekede buluna. Rustem Osmanovnıñ grajdan apayınıñ QUGna añlatqanına köre, müstemlekeniñ reberligi onı rusiye vatandaşı olmağa ve Ukrainağa qarşı cenkleşmege mecbur ete, – beyanatta yazıldı.

Bildirildi ki, 2022 senesi avgust ayında Qırımda Rustem Osmanovnıñ qırımtatar batalyonında sanki iştirak etmesi içün altı senege maküm etildi.

2022 senesi aprel ayında qırım tfh, onıñ «Qırımğa “Аrmânsk” maşna keçit notası vastasınen ketmege tırşqanını» qayd etip, onı tuttı.

Dekabr ayınıñ soñunda Osmanov mektüp yollamağa becerdi. Anda o añlattı ki, Geniçeskte tutuldı ve azaplandı.