Siyasiy mabüs Ekrem Kroş SİZOda işkenceler çekkenini bildirdi
![Siyasiy mabüs Ekrem Kroş SİZOda işkenceler çekkenini bildirdi](https://qtmm.org/wp-content/uploads/2024/06/ekrem-krosh.jpg)
Hizb ut-Tahrirniñ “Ekinci Canköy” gruppasınıñ iştirakçisi Ekrem Kroş Rostov-na-Donudaki SİZOnıñ hadimleri tarafından işkence çekkenini bildirdi. “Qırım birdemligi” bu aqqında haber berdi, dep Qırım.Aqiqat qoştı.
Onıñ sözlerini advokat Oleksiy Ladin bildirdi. Kroş, işkence sebepsiz qullanılğanını qayd etti ve bozarğan aynıñ 16-nda mabüsler izolâtornı zapt etkenleri içün böyle olğanını tahmin etti. O vaqıt, kütleviy haber vastalarınıñ bildirgenine köre, SİZOtintildi, hadimler ve mabüsler sorğuğa çekildi. Ekrem Kroş makeme oturışınıñ protokolına işkence aqqında bildirdi.
“İleride imaye [bu vaqiağa] qıymet kesip, qabaatlılarnı mesüliyetke çekmek içün bir sıra protsessual tedbirler keçirecek”, — dep Aleksey Ladin dedi.
O, işkence tek Ekrem Kroşqa qarşı qullanılğanını ilâve etti. İşniñ başqa iştirakçileri yaralanmadı. Olarnıñ episi özlerini “bir derece yahşı” is etkenlerini bildirdiler.
İmaye, aynı qabaatlayııc qararnen keçken, amma başqa esnasta makeme etilgen — taqiqatnıñ versiyasına köre, Hizb ut-Tahrir bölüginiñ iştirakçileri olğan şaatlarnı da çağırmağa rica etti. Makeme advokatlarnıñ şaatlarnıñ ifadeleri “Сanköyniñ ekinci gruppası”nıñ qabaatını ya da qabaatsızlığını belgilemege yardım etecegine dair delillerini qabul etmedi ve sorğudan vazgeçti.
“Resmiy olaraq, söz şaatlar aqqında ketmey, amma Rusiye Federatsiyasınıñ Cinaiy-protsessual qanunnamesine köre, şaat – baqılğan davanıñ vaziyeti aqqında bir şey bilgen şahıstır. Bu şahıslar dava aqqında bir şey bilse, olarnı sorğuğa çekmek kerek. Olarnıñ sorğuğa çekilmesini tekrar talap etecekmiz ve olarnıñ yazılı ifadelerini imaye etecekmiz, olar davalılarımıznıñ hususiyetlerini kösterecek”, – dep Ladin qoştı.