Siyasiy mabüs Andriy Zahtey Rusiyeni terk ete ve Ukrainağa kete

14 Iyün 2023

Qırımda «ukrain diversantları» davasına istinaden maküm etilgen Andriy Zahtey Rusiyeden Litvaniyağa yol aldı – andan siyasiy mabüs Ukrainağa ketti. Qırım.Aqiqat bunı yazdı.

Kiçik ayda Zahtey müstemlekeden azat etildi, lâkin rus akimiyeti oña Ukrainağa ketmege izin bermeyip, Rostov vilâyetindeki Ecnebiy vatandaşlarnı vaqtınca tutuv merkezine yerleştirdi.

Bozarğan aynıñ 13-ünde aqşam maalinde Latviyadaki Ukrainanıñ elçihanesiniñ hadimleri Zahteyni Ubılınka sıñır noqtasında qarşılap, Ukrainağa yol aldı, dep bildirildi.

Saban ayınıñ 8-inde ukrain Devlet migratsiya hızmeti, Andriy Zahteyniñ Ukrainağa qaytması içün oña vesiqa bermege red etti. Ukraina ve rf arasında konsullıq bağları olmağanından sebep siyasiy mabüs tek üçünci memleketlerden kete bilir. 

2016 senesi arman ayında Andriy Zahtey rusiye FSB tarafından tutuldı. O zaman işğal etilgen Qırımda rusiye mahsus hızmeti, yarımadada terakt azırlağan «ukrain diversantları» gruppasını tuttı. Birazca tutulğanlarnı Moskvadaki Lefortovo SİZOda buluna ediler, soñ olar Qırımğa qaytarıldı.

Rus mahsus hızmetleri, bu dava boyunca tutulğan Yevheniy Panov ve Andriy Zahtey yarımadanıñ turistik ve içtimaiy astyapı obyektlerinde terror ücümlerini kerçekleştirmege planlaştırğan edi, dep bildirdi.

Zahtey tahqiqatnen makemeden evel añlaşmanı imzaladı. Onı 6 sene ve 6 aylıq sert rejimli müstemlekede qalmasına maküm ettiler ve 220 biñ ruble (tahminen 105 biñ grivna) para cezasını berdiler.

Ukrain akimiyeti rusiyeniñ ukrainalılarğa qarşı qabaatlavını red etti ve bunıñ rus mahsus hızmetleriniñ provokatsiyası olğanını adlandırdı.