Siyasiy mabüs Amet Süleymanovnı apishaneden azat etmege red ettiler – onıñ sağlığı zayıflaşa

01 Iyül 2024

Vladimir şeeriniñ Frunze rayon makemesi, Bağçasaraylı qırımtatar Amet Süleymanovnı azat etmege red etti. Apis şaraitine uyğun olmağan onıñ hastalıqlarına baqmadan makeme böyle qarar aldı. Onıñ imayecisi Lilâ Gemeci bunı “Qırım birdemligi”ne añlattı.

“Bizim daa bir delilimiz, mabüsim Vladimirniñ 2. apishanesine avuştırılğan soñ, Federal Cezalar hızmeti tarafından qanunsız şekilde yapılğan tıbbiy teşkerüvniñ zıddiyetli olğanı edi. Amet Süleymanovnıñ diagnozları ve teşkerüvlerinen bağlı başqa tibbiy hulâsalarnı mustaqil mütehassıs teşkilâtına yolladıq. O, imayeci tarafnıñ Süleymanovnıñ hastalıqları bar olğanına dair delillerini tasdıqladı. Amma makeme bunı körmemezlikke urdı”, – dep uquqçı qoştı.

Lilâ Gemeciniñ sözlerine köre, apiske alınğan soñ Ametniñ sağlıq vaziyeti “pek zayıflaştı”. Oña yañı bir diagnoz qoyuldı – közniñ ağınıñ hipertonik angiopatiyası, dep Qırım.Aqiqat bildirdi.

“Bu, yüksek basım sebebinden közleriniñ körme qabiliyetiniñ deñişkenini köstere. O, çoq vaqıt oqup olamay, yazıp olamay, közleri daima yaşlana. O, yatqan soñ burunında qaynağan qan ve qanlı yastıqnı tapqan edi. Oña kerekli tibbiy teşkerüv yapılmay, ilâclar berilmey, tek hastalıqlarınıñ alâmetleri yoq etile”, — dep Gemeci añlattı.

2021 senesi “qırım musulmanları davası” çerçivesinde rusiye makemesi Amet Süleymanovnı 12 senege maküm etti. Sağlıq alı sebebinden üç sene ev tevqifi astında edi.