«Simferopol» halqara ava limanına Sovetler Birliginiñ eki defa Qaramanı Amethan Sultannıñ adı berilmesi aqqında» Qırımtatar halqı Qurultayınıñ muracaatı

14 January 2013

Ukraina Prezidenti V. F. Yanukoviçke

Ukraina Yuqarı Şurasınıñ Reisi V. V. Rıbakqa

Ukraina Baş naziri N. Ya. Azarovğa
 

“Simferopol” halqara ava limanına Sovetler Birliginiñ eki defa Qaramanı Amethan Sultannıñ adı berilmesi aqqında”

Qırımtatar halqı Qurultayınıñ muracaatı.

Sovetler Birliginiñ nam qazanğan uçucı-sınavcısı, SSSR Devlet Mukâfatınıñ saibi, Sovetler Birliginiñ eki defa Qaramanı Amethan Sultan 1920 senesi oktâbr 25-te Qırımnıñ Alupqa şeerinde dünyağa keldi. Ekinci cian cenki devamında 600 uçuş yapıp, duşmannıñ 30 uçağını şahsen ve 19 uçaqnı gruppa erkânında urıp tüşürdi. Qırım kökünde faşistlerniñ altı arbiy uçağını işten çıqardı.

Cenkten soñ Amethan Sultan 25 yıl ilmiy-araştıruv institutında uçucı-sınavcı olıp çalıştı, 100-den ziyade uçaqlarnı sınavdan keçirdi. Amethan Sultannıñ tedqiqatları cian ve devlet aviatsiyası içün öz emiyetini bugün de coymadı. O, birinci kosmonavtlar Yuriy Gagarin, German Titov, Pavel Popoviç ve digerlerini uçuvğa azırlavda bivasta iştirak etti.

Amet-Han Sultan 1971 senesi fevral 1 künü nevbetteki sınav vaqtında facialı elâk oldı. Moskvada Novodeviçye mezarlığında defn etildi.
Yüksek professional ustalığı, cesürligi, namuslığı, adaletseverlegi ve ana yurtqa sıñırsız sevgisi ile Amethan Sultan öz halqı, zenaatdaşlarınıñ ürmetini qazanabildi.

Şanlı qaramannıñ 90 yıllığı arfesinde cian ve ukrain cemaatçılığı, dünyanıñ çeşit devletlerinde yaşağan professional uçucılar, onıñ semetdeşleri, şegirtleri Ukraina devlet akimiyeti adına “Simferopol” halqara ava limanına Sovetler Birliginiñ eki defa Qaramanı Amethan Sultannıñ adı berilmesi aqqında” çoqtan-çoq muracaatlarnen çıqışta bulundılar.

Teessüf ki, Qırım ükümeti tarafından ait qarar alâ daa alınmadı. Şunıñ içün 2013 senesi yanvar 8-de Ukraina Yuqarı Şurasında “Simferopol” halqara ava limanına Sovetler Birliginiñ eki defa Qaramanı Amethan Sultannıñ adı berilmesi aqqında”
№ 1210 Qararnıñ leyhası cedvelge alındı.

Qırımtatar halqınıñ qurultayı efsaneviy uçucı Amethan Sultannıñ adını edebiyleştirüv boyunca keniş cemaatçılıqnıñ teşebbüsine qoltutaraq Ukraina devleti akimiyetiniñ yolbaşçılarına Ukraina Yuqarı Şurası Qararınıñ mezkür leyhasına qoltutmaq ve Ukrainanıñ aviatransport qurumı olğan “Simferopol” halqara ava limanına Amethan Sultannıñ adı berilmesine siltem bermek ricasınen muracaatta buluna

Qırımtatar halqı V Qurultayınıñ beşinci sessiyasında qabul etildi
2013 senesi yanvar 12
Aqmescit ş..