Şimaliy Qıbrızda tasil alğan talebelernen körüşüv

13 Fevral 2012

Üç yıl evelsi qırımtatar halqı Meclisiniñ reisi Şimaliy Qıbrızda ziyaretnen bulunğan vaqıtta Lefkoşa ş. “Yaqın doğu tehnik” universitetiniñ rektorı Suat Günselnen olğan körüşüv neticesinde mezkür universitet ve Milliy Meclis reisi arasında devletten tış añlaşmalar tizilip, Şimaliy Qıbrız universiteti qırımtatar yaşları içün kvotalar ayırmaq mecburiyetini öz üzerine aldı.

Añlaşma boyunca er yıl üç talebe oquşqa yollanıla.

– Oquşqa istidatlı yaşlarnı yolladıq. Bazı balalar tasilni birinci kurstan başladı, çoqusı ise ihtisasları boyunca magistraturada tasil almağa bilgileri yeterli olğan istidatlı yaşlarğa yollanma berdik. Al-azırda anda 8 talebele aliy tasil ala. Olardan ümütimiz büyük, episi tasil alıp, dissertatsiyalarını qorçalap, öz Vatanlarına qaytır, halqına hızmet eter. Milliy Meclis Şimaliy Qıbrızda oquğan yaşlarımız içün şaraitler yaratmağa areket ete. Bizim muracaatlarımız sayesinde Türkiye ükümeti Şimaliy Qıbrızda oquğan er bir qırımtatar talebesine yılda 1 biñ dollar miqdarında stipendiya ayıra, ileride bu stipendiya arttırılması içün çareler körecekmiz. Biz, umumen, çet elge oqumağa yollağan talebelerimiznen er vaqıt bağ tutamız, olarnıñ oquvında, turmuş şaraitlerinde peyda olğan problemlerni çezmege tırışamız, – dey Meclisniñ medeniyet ve tasil idaresiniñ başı Safure Kacametova Qıbrızdan tatilge kelgen talebelernen olğan körüşüvde.

– Lefkoşa universitetinde çeşit türkiy memleketlerden kelgen 18 biñ talebe tasil ala. Oqutuv ingliz tilinde, dersliklerniñ deyerlik episi türk tilinde, şunıñ içün bu eki tilni de mükemmel bilmek kerek. Anda oquv tölevli, başqa studentler bir yılda 7 biñ yevro töleyler, yataqhane içün 3,5-5 biñ yevro bereler. Qırımtatar yaşları içün bularnıñ episi bedava. Bundan da ğayrı, bizge künde 3 kere bedava yemek bereler, yılnıñ soñunda ise 1 biñ dollar miqdarında stipendiya bereler. Başqa studentlerden tek gagauz yaşlarına bazı imtiyazlar bar, – dey turizm ve ötelcilik fakultetiniñ 3-nci kursında oquğan Leniye Galiçenko.

Keçken sene ingliz tili boyunca magistraturada tasilini devam ettirmege ketken Alime Çurlu qırımtatar tilinde qonuşmağa qıynala edi, şimdi ise öz teessuratlarınen ana tilinde paylaşqanı epimizni quvandırdı:

–Oquvımnı pek begenem. Bütün şaraitler mevcut, kitaphane pek zengin, ocalar pek küçlü, – dey qız.

Leylâ Mamutova menecment fakultetinde tasil ala:

– Qırımda ingliz tili boyunca alğan bilgim mükemmel olğanı içün, anda ingliz tilinde oqumaq men içün qıyın degil. Studentler arasında qonuşma tili qırımtatar tiline yaqın türk tili olğanı da biz içün pek yahşı. Problemalarımız şimdilik yoq. Yataqhanemizni deñiştirecek oldılar, biz Qırımğa haber ettik ve Milliy Meclis reisi Mustafa Cemilev ve Safure oca bu meseleni acele sürette çezdiler, – dey Leylâ.

– Biz Türkiye ükümetine, Qıbrız universiteti ve Meclisimizge bizge oqumaq içün imkân bergenleri, şarait yaratqanları içün minnetdarlıq bildirip, yahşı oqup, ilim saipleri olıp Qırımğa qaytıp kelmek kerekmiz, – dediler körüşüvnıñ soñunda qızlar.