Sentâbr 1 – Bilgi künü

01 September 2012

Sentâbr 1-de Qırımnıñ bütün mekteplerinde Bilgi kününe bağışlanğan tantanalı tedbirler ötkerildi.

Evelki yıllardakisi kibi Qırımtatar halqı Meclisiniñ azaları bu künü qırımtatar tilinde tasil berilgen mekteplerni ve milliy sınıflar açılğan mekteplerniñ tantanlarında iştirak ettiler. Meclis reisiniñ birinci muavini Refat Çubarov Eski Qırımdaki 361 talebe oquğan ve olardan 35-i birinci sınıf talebeleri olğan 2-nci sanlı mektepni ziyaret etti.

Musafirler arasında İslâm Terek regional meclis reisi Ekrem Abdulvaapov, Eski Qırım şeer meclisiniñ reisi Dilâver İsmailov, Eski Qırım musulman cemiyetiniñ reisi Rasim Sadredinov, İslâm esasları derslerini bergen oca Reşid Keles, şeer golovası Pötr Katük, İslâm Terek rayon devlet memuriyetiniñ başı Amet Halitov bar ediler.

Belli ki Eski Qırımdaki qırımtatar tilinde oqutılğan orta mektep 1995 senesi Eski Qırım şeer meclisi etrafında birleşken ana-babalar ve ocalarnıñ ğayreti sayesinde açıldı. Mektepniñ açılmasına salmaqlı isse qoşqan oca Ayşe Çabanova bugün de şu mektepke müdirlik yapa.

16 yıl içinde mektep pek çoq dostlarnı, şu cümleden Türkiye ve Poloniyadan, peyda etti. Dostlarnıñ yardımınen mektep içün ayırılğan bina tolusınen tamirlendi, sınıf odaları ise zarur eşyalarnen, oquv qullanmalarınen, bilgisayarlar ile donatıldı.

Sentâbr 1 tantanasınıñ eñ eyecanlı daqqası –Ukraina ve diger devletlerniñ aliy oquv yurtlarına kirgen 2012 senesi mektep mezunlarınıñ ve mektep bosağasını ilki kere atlağan kencelerniñ cedveli oqulması oldı.

Tantanalı tedbirniñ soñunda mektep musafirleri ve memuriyet azalarınıñ toplaşuvı olıp, onda mektepniñ birinci dereceli planları, şu cümleden mektepte “Küreş” sport sektsiyasınıñ açılması muzakere etildi. Bu munasebetnen mektep memuriyeti “Küreş” Qırım federatsiyasına yardım sorap muracaat etti.