Saylav bülletenlerinde teşkilâtlarnıñ sırası belgilendi

04 April 2013

Merkeziy saylav komissiyası teşkil etken ve keçirgen merasimde cedvelge alınğan 14 teşkilât iştirak etti. Tedbir başlamazdan evel Qırım musulmanlarınıñ müftisi acı Emirali Ablayev er keske saylavlarda yeñiş qazanmaqnı tilep, saylavlar vaqtında faqat musaade etilgen usullardan qullanmaqnı tevsiye etti.

Bundan soñ Merkeziy saylav komissiyanıñ başı Zair Smedlâyev cedvelge alınğan teşkilât ve bloklarğa Qurultay delegatlığına namzetlik şeadetnamelerini bergen soñ kura çeküv başlandı. Onı Merkeziy saylav komissiyasınıñ azası İzet İzedinov alıp bardı.

Er bir teşkilâtnıñ vekili qutu içinden nomer yazılğan kapsulanı çıqarıp, böyleliknen teşkilâtnıñ çoqmandatlı proportsional saylav dairesi boyunca saylav cedvelinde sırasını belgiledi.

Kura çeküv neticeleri:

№ 1 – “Maarifçi” qırımtatar tasil hadimleriniñ birligi;

№ 2 – “Bizim Qırım” halqara cemaat teşkilâtı;

№ 3 – “Qırımtatar medeniyet vaqufı” (Medeniyet) cemaat teşkilâtı;

№ 4 – “İnkişaf” qırımtatarlar birligi” cemaat teşkilâtı;

№ 5 – “Adalet” qırımtatar milliy partiyası;

№ 6 – “Yaşlar Şurası” cemaat teşkilâtı;

№ 7 – “Avdet” cemaat teşkilâtı;

№ 8 –Qırımtatar halqı milliy areketiniñ teşkilâtı (OKND);

№ 9 –”Milliy Haq” saylav blokı (Qırımtatarlar tarihı ve medeniyeti tedqiqatçılarınıñ birligi, “Evlât” Aqmescit şeer cemaat teşkilâtı, “Bağçasaray şeerini regional inkişaf ettirüv agentligi”, “Ocalar keñeşi” cemaat teşkilâtı, “Milleks” cemaat teşkilâtı, “Qırım gazetası muarririyeti” cemaat teşkilâtı, “Qırım inkişafı vaqufı” cemaat teşkilâtı”)

№ 10 – Qardaşlıq-Qarasu – Qırımtatar Yaşlar Merkezi (KMTs) saylav blokı;

№ 11 – “Küreş” Qırım milliy küreş federatsiyası” cemaat teşkilâtı;

№ 12 – “Arqadaş” uquqqorçalayıcı cemaat teşkilâtı;

№ 13 – “Azatlıq” saylav blokı ( “Azatlıq” Qırımtatar uquqqorçalayıcı teşkilât, “Borazan” informatsion-yarıqlandıruv merkezi”, “Tayanç” cemaat teşkilâtı, “İnsaf” cemaat teşkilâtı).

№ 14 – “Qırımtatar qadınlar birligi” cemaat teşkilâtı.


Kura çekilgen soñ teşkilât ve bloklarnıñ vekilleri saylav ceryanında neler yasaq etilgeni ve musaade etilgeni hususında öz fikir-mulâazalarını bildirdiler. Qırımtatar qadınlar birliginiñ reisi ATRde Qurultayğa saylavlar reklaması tek rus tilinde degil, qırımtatar tilinde olmaq kerek, degen teklif kirsetti.

Toplaşuvnıñ soñunda Merkeziy Saylav komissiyasınıyeñ reisi Zair Smedlâyev saylavlar iştirakçilerine muvafaqiyetler tilep, öz tarafından bu kampaniya “Qurultay delegatlarını saylav nizamnamesi”niñ talapları boyunca keçmesi içün elinden kelecegini yapmağa söz berdi.