Saq regional meclisiniñ azaları Mustafa Cemilev Halqara forum keçirilmesiniñ kefili olacağına eminler

16 Sentâbr 2013

Saq regional meclis azaları 6-ncı çağırılış Qurultay delegatlarına Qurultaynıñ 2013 senesi oktâbr ayında ötkerilecek 1-nci sessiyasında Qırımtatar halqı milliy areketi veteranları ve “İnkişaf” cemaat teşkilâtınıñ Mustafa Cemilevni yañı müddetke Meclis reisi etip saylamaq aqqında açıq mektübine qoltutmaq ricasınen muracaatta bulundılar.

“Biz, Saq regional meclisiniñ azaları, öz toplaşuvımızda milliy areket iştirakçileriniñ 2013 senesi avgust 21-de 6-ncı çağırılış Qurultay delegatlarına Mustafa Cemilevni yañı müddetke Meclis reisi etip saylamaq aqqındaki muracaatını muzakere etip, bunıñ kibi de şu mektüpke qoltutaraq Qırımtatar halqı milliy areketi veteranları ve “İnkişaf” cemaat teşkilâtından Qurultayğa saylanğan delegatlarnıñ 2013 senesi sentâbr 2-de yazğan beyanatlarını ve sentâbr 12-de milliy areket veteranlarınıñ işbu beyanatqa qoltutıp yapqan çıqışlarını baqıp çıqaraq aşağıdakilerni bildiremiz:

– biz milliy areket veteranlarınıñ açıq mektübindeki Mustafa Cemilevni yañı müddetke Milliy Meclis reisi olaraq saylamaq teklifine qoşulamız;

– biz halqımıznıñ lideri Mustafa Cemilevden milliy areket veteranları, Qurultay delegatlarınıñ onı Meclis reisi olaraq saylamaq tekliflerine añlayışnen yanaşmaqnı rica etemiz. Bu, ilk-evelâ halqımıznıñ kelecegi içün telâş, Qurultay-Meclis sistemini milliy idare organı olaraq qorçalamaq ve saqlap qalmaq tüşüncesinden kelip çıqa;

-biz ümüt etemiz ki, 6-ncı çağırılış Qurultay delegatları Meclis azalarınıñ yañı, professional seviyede namusnen çalışqan, öz saylavcıları ögünde daima esap bergen taqımnı saylarlar;

– bizni Qırımtatar halqınıñ meseleleri boyunca Halqara forumını keçirmek meselesi pek raatsızlay. Biz eminmiz ki, faqat Mustafa Cemilevniñ şu forumda Milliy Meclis reisi sıfatında iştirak etmesi ve onıñ halqara derecedeki itibarı forumnıñ halqımız menfaatlarına uyğun şekilde keçirilmesini teminleyebilir.

6-ncı çağırılış Qurultay delegatlarından bizim muracaatımızğa qoltutmalarını rica etemiz.