Şair ve yazıcı Şeryan Ali 75 yaşını toldurdı

31 August 2012

2012 senesi avgust 30 künü İ. Gasprinskiy adına qırımtatar kütüphanesiniñ oquv zalında kütüphane ve qırımtatar yazıcılar birligi şair ve yazıcı Şeryan Ali 75 yaşını toldurğanı munasebetinen tantanalı tedbir keçirdiler.

İ. Gasprinskiy adına qırımtatar kütüphanesiniñ hadimleri Şeryan Ali eserlerinden tertip etilgen fotovesiqalı sergini teşkil etip, onda şairniñ kitapları, resimleri ve onıñ aqqında maqaleler taqdim olundı.

Şairni Ukraina yazıcılar birliginiñ azaları Riza Fazıl, İsa Abduraman, Qırım Yuqarı Şurasınıñ deputatı, Meclis medeniyet ve maarif bölüginiñ başı Safure Kacametova, “İlham” edebiy klubınıñ azazaları ve digerleri hayırladılar. Tedbirni Qırımtatar akademik muzıkalı-drama teatriniñ rejissörı Refat Seytablayev ve yırcı Rustem Memetov halq yırlarını icra etip yaraştırdılar.

Malümat:

Şeryan Ali (Aliyev) Aqmeçit rayonınıñ Camal (Nizovka) köyünde dünyağa keldi. Sürgünlikte Özbekistannıñ Mırzaçölüne tüşti. Taşkent pedagogika institutını bitirgen soñ mektepte ocalıq yaptı, rayon gazetası muarririyetinde çalıştı, Cizaq vilâyet radio ve televideniye boyunca komitet müdiri oldı. Edebiyatqa publitsist, bir sıra problem maqaleler müellifi olaraq kelip, tez arada zemaneviy qırımtatar şairler sırasından munasip yer aldı.

Onıñ “Ömür dalğaları” serlevalı birinci şiirler cıyıntığı 1974 senesi Taşkentte neşir etildi. Bundan soñki cıyıntıqları onı şiiriyette öz yolunı tapabilgen özgün şair olaraq köstereler. Poema janrında bayağı muvafaqiyetlerni elde etken Şeryan Ali bugünki künniñ ğayet müim ahlâq, vatanperverlik, til meselelerini kötere. Mevzu boyunca çeşit olğan şiirleriniñ tili sade, samimiy ve merhametli. Şair eserleriniñ lirik hususiyetleri bestekârlarnıñ da diqqatından çette qalmadı, onıñ şiirlerine bir sıra yırlar yazıldı.

Şeryan Ali Ukraina yazıcılar birliginiñ azasıdır.

Qırımğa şair 1995 senesi qaytıp keldi ve bu devir onıñ icadınıñ eñ mahsuldar devridir. İ. Gasprinskiy kütüphanesi yanındaki “İlham” genç istidatlar klubına yolbaşçılıq yapa.