Şair Şakir Selimniñ aydın hatırasına

12 Aprel 2012

Şakir Selim 1942 senesi aprel 10-da Kırımnıñ Aqşeyh rayonındaki Büyük-As köyünde (şimdi bu köy yer yüzünde yoq) doğa. Vatandan sürgün etilgen qorantasınen Özbekistannıñ Cambay rayonına tüşe. Nice meşaqatlarnen orta mektepni bitire, soñra Samarqand devlet universitetiniñ filologiya fakultetinde aliy tasil ala. Emek faaliyetini ocalıqtan başlay. Soñra çoq yıllar devamında “Lenin bayrağı” gazetasınıñ Samarqand vilâyeti boyunca öz mühbiri olıp çalışa, Samarqand vilâyet radiosınıñ qırımtatar tilinde eşittirüvler bölügine yetekçilik yapa. 1989 senesi Şakir Selim Vatanğa qaytıp kele ve mında yañı çıqıp başlağan “Dostluq” gazetasında baş muarrirniñ muavini ola. 1997 senesinden ise o, “Yıldız” jurnalınıñ baş muarriri vazifesinde bulundı. 1992 senesi “Yañı dünya” ve “Yıldız” jurnalınen beraber Vatanğa qaytıp kelgen yazıcılarımız Qırımtatar edebiyatı keñeşini teşkil eteler ve Şakir Selimni bu keñeşniñ reisi olaraq saylaylar. Şair öz omuzlarına alğan ağır ve mesülietli bu yükni ömüriniñ soñki kününe qadar taşlamay.

Şairniñ ilki şiirleri matbuatta 1963 senesi basılıp başlana. Onıñ şiirleri “Lenin bayrağı” ve soñra “Yıldız” jurnalı saifelerinde daima yer alalar. Vatanda Şakir Selimniñ 1996 senesi “Tüşünce” adlı şiirler ve tercimeler kitabı çıqtı. 2004 senesi Kiyevde “Etnos” neşriyatında Ş. Selimniñ tercimesinde Adam Mitskeviçniñ “Qırım sonetleri” türkümi leh, ukrain, qırımtatar ve rus tillerinde ayrı kitap olaraq neşir olundı. 2006 senesi “Qırımname” adlı eki cıltlıq saylama eserleriniñ 1-nci cıltı, 2008 senesi ise 2-nci cıltı (çoq yazıqlar olsun, müellifke bu kitapnı körmek qısmet olmadı) neşirden çıqtı.

Şair tercime saasında da israrlı çalıştı ve bunda da o ciddiy qazançlar elde etti. O, A.Puşkinniñ “Kavkaz esiri” poemasını ve “Küçük facialar”ını, M. Lermontovnıñ şiirlerini, A.Tvardovskiyniñ “Hatıra uquqı” poemasını, T.Şevçenkonıñ “Katerina” adlı poemasını, leh klassik şairi Adam Mitskeviçniñ “Qırım sonetleri”ni ana tiline tercime etti. Qırımtatar akademik teatrinde onıñ tercimesinde bir sıra spektakller (M.Karimniñ “Ay tutulğan gecesi”, N.Gogolniñ “Evlenüv”, V.Şekspirniñ “Makbet”) sanalaştırıldı.

Şakir Selim 2008 senesi noyabr 18-de bu fani dünyanı terk etip, ebediylikke avuştı. Allanıñ rahmetinde olsun.

İsmail Gasprinskiy adına kitaphane şair Şekir Selimniñ 70 yıllığına bağışlap teşkil etken hatıra tedbirinde qırımtatar siyasetçileri, yazıcılar, ocalar, sanakârlar, jurnalistler ve şairniñ qızları, torunları iştirak ettiler.

Şakir Selimniñ aydın hatırasına bağışlanğan aqşam şairniñ icadı ve faaliyetini aydınlatqan basma ve foto materiallardan ibaret sergi numayışınen başlandı ve toplanğanlarnıñ diqqatına şairniñ çıqışlarından ve onıñ ömürinde belli yer alğan meslekdeşleri, dostlarınıñ hatırlavlarından ibaret keniş mündericeli film numayış etildi.

Kitaphane müdiri Gülnar Yağyayeva, müdir muavini Leylâ Qadırova (tedbirni alıp bardı), Qırım Yuqarı Şurasınıñ deputatı, Milliy Meclis reisiniñ birinci muavini Refat Çubarov, Qırım Yuqarı Şurasınıñ deputatı, „Maarifçi” birleşmesiniñ reisi Safure Kacametova, Reskomnats reisiniñ muavini Emine Avamileva, QMPUniñ rektorı, şairniñ yaqın dostu Fevzi Yaqubov, belli şair Şeryan Ali, İ. Gasprinskiy adına kitaphaneniñ sabıq müdiri Ayder Emirov, „Golos Krıma” gazetasınıñ baş muarriri Eldar Seytbekirov, professor İsmail Kerimov, „Qırım” teleradiokomapiyasınıñ sabıq muarriri Subiye Nalbantova, çoq yıllar devamında beraber çalışqan dostu, yazıcı Ablâziz Veliyev çıqışta bulunıp, ömürleriniñ soñuna qadar hatıralarında saqlanacaq hatırlavlarınen paylaştılar, klassik şair Şakir Selim müim vaqiağa çevirilgen er bir eserinen, er bir çıqışında keskin, qaramaniy, tenqidiy ve adaletli fikirlerinen halq arasında sayğı-ürmet qazanğan icatkâr olmaqnen birlikte, o, sadıq dost, evlâtlarını sevgen merhametli baba olğanını ve başqa eyi çizgilerini qayd ettiler.

Ğayet samimiy ve sıcaq müitte keçken aqşamda Şakir Selimniñ eserleri ve şair sevgen yırlar da yañğıradı. Belli qırımtatar yırcıları Rustem Memetov – „Dünya bizge baqıp bir köznen ağlay, bir köznen küle”, „Âralanğan türküler”, Gülizar Bekirova – „Meni de ğamdan azat eyle”, Uryane Kecikayeva – „Çal, kemane” yırlarını icra ettiler. Qırımtatar drama teatriniñ artisti Fatma Asanova şairniñ „İnsanğa” şiirini ana tilimizde, maarifçi Aliye Bahşişeva ise rahmetli ömür arqadaşı İsmet ağa Mecitov aynı bu şiirniñ rus tiline yapqan acaip tercimesini oqudılar. Şairniñ torunı Ediye Qurtmollayeva qartbabası yazğan „Kobelek” şiirini pek tesir icra etip, toplanğanlarnıñ alğışlarını qazandı.

Aqşamnıñ soñunda Şakir Selimniñ qızı, QMPU ocası, filologiya ilimleri namzeti Leniyar Selimova şairniñ üç qızı ve torunları adından bu aqşam teşkilâtçılarına, babasına sayğı-ürmet izhar etip tedbirde iştirak etkenlerniñ episine teşekkürler ayttı.