Safure Kacametova: «Sabriye Erecepovanı çoqları Qırımnıñ anası, dey ecdiler»

10 Iyül 2012

İ. Gasprinskiy adına cumhuriyet qırımtatar kütüphanesinde meşur yırcı, Qırımda ve Özbekistanda hızmet köstergen artist Sabriye Erecepovanıñ resimi olğan markalanğan zarflarnıñ taqdimnamesi olıp keçti. Tedbir Sabriye Erecepova doğğanınıñ 100 yıllığı munasebetinen keçirile.

Zarflar taqdiminde Meclis reisiniñ muavini, Qırım Yuqarı Şurası daimiy komissiyasınıñ reisi Remzi İlyasov, Qırım Yuqarı Şurasınıñ deputatı, “Maarifçi” birleşmesiniñ reisi Safure Kacametova, Qırımtatar qadın-qızlar birleşmesiniñ reisi Safinar Cemileva, Qırım milletlerara munasebetler ve sürgün etilgen grajdanlarnıñ işleri boyunca cumhuriyet komitet reisiniñ muavini Emine Avamileva, “Ukrpoçta” Qırım direktsiyasınıñ müdiri Ruslana Krizskaya, Sabriye Erecepovanıñ şegirtleri, aqrabaları ve cemaatçılıq vekilleri iştirak ettiler.

“Sabriye Erecepovanıñ adı qırımtatar halqı arasında endi bir efsanege çevrildi, – dedi öz çıqışında Meclis reisiniñ muavini, Qırım Yuqarı Şurası daimiy komissiyasınıñ reisi Remzi İlyasov. – Er bir qoranta bu adnı eşitkeninen tek bahtlı künlerini hatırlay. Sabriye Erecepovanıñ 100 yıllığı – bu bütün halqımız içün bayramdır”.

Remzi İlyasov bunıñ kibi Ukraina Yuqarı Şurasında №10438 “Sabriye Erecepova doğğanınıñ 100 yıllığı aqqında” Qararnıñ leyhasını cedvelge aldırğan Ukraina halq deputatı, Milliy Meclis reisi Mustafa Cemilevge ayrıca teşekkürini bildirdi. Belli ki, bu leyha esasında Ukraina parlamenti iyül 5 künü mezkür Qararnı qabul etti.

Qırımtatar halqı Meclisiniñ Medeniyet ve maarif meseleleri boyunca idaresiniñ başı Safure Kacametova “Ukrpoçta” hadimlerine endi dörtünci böyle yubiley zarflarını azırlağanları içün minnetdarlıq bildirip: “Bizler içün bu pek quvançlı bir kün. Sabriye Erecepovanı bir çoqları Özbekistanda Qırımnıñ anası, dey ediler. Kerçekten de o, halqımıznen yaşadı, onıñ ayırılmaz bir parçası oldı. Şimdiki yaş sanatçılarımız ondan ibret almalılar, onıñ kibi aqiqiy vatanperver olmalılar”, dedi.

Çıqışınıñ soñunda Safure Kacametova özüniñ ve qırımtatar ziyalıları adından Mustafa Cemilevge büyük yırcımıznıñ hatırasını ebediyleştirüv oğrunda yapqan işi içün teşekkür sözlerini ayttı.

“Sabriye Erecepova – öz halqınıñ munasip qızı. Qırım onıñ ile ğururlanmağa aqlıdır. Vatan sevgisi içün stalin lagerlerinde 10 yıl tutuldı. Sabriye Erecepova içün yapqan bugünki işlerimiz yapmaq borclu olğan işimizniñ ufaq bir qısmıdır”, – dedi Qırımtatar qadın-qızlar birliginiñ reisi Safinar Cemileva.

S.Cemilevanıñ aytqanına köre sentâbr ayında Sabriye Erecepovanıñ yubileyine bağışlanğan bir sıra tedbirler, şu cümleden Qırımtatar akademik muzıkalı drama teatrinde Hatıra aqşamı, keçirilecek.

Sabriye Erecepovanıñ şegirtleri – Rustem Memetov, Gülizar Bekirova, Üriye Kermençikli, Zarema Almazova ve çoqları efsaneviy yırcını hatırlarkenler, onıñ öz halqına, halq yırlarına sevgisini qayd ettiler.

Zarf taqdiminde mahsus şu tedbir içün Amerikadan kelgen sürgünlikten evelki qırımtatar teatriniñ artisti Ayşe Dittanova ve yırcı Üriye Kermençikli de iştirak ettiler.