Safure Kacametova: Noman Çelebicihan halqı içün qurban oldı ve bizim hatıramızda ebediy yaşaycaq

22 February 2013

22 fevral künü Aqmescitte Noman Çelebicihan öldürilgeniniñ 95 yıllığı munasebetinen planlaştırılğan tedbirler çerçivesinde İ. Gasprinskiy adına qırımtatar kütüphanesinde milletniñ şeitine bağışlanğan sergi açıldı.

Onda Meclis medeniyet ve tasil idaresiniñ başı, Qırım Yuqarı Şurasınıñ deputatı Safure Kacametova, qırımtatar yazıcıldar birliginiñ reisi Riza Fazıl, yazıcılar, Tavriya Milliy universitetniñ studentleri, cemaatçılıq vekilleri iştirak ettiler.

“Bugün Qırımda bundan 95 yıl evelsi vahşiylerce öldürilgen Noman Çelebicihannıñ hatırasına bağışlanğan tedbirler keçirilmekte. Ulu Noman Çelebicihannı añmaq bizim boyun-borcumızdır”, – dedi Safure Kacametova.

Safure Kacametova qayd etti ki, hatıra tedbirlerini bütün cemaat teşkilâtları sırasında İ. Gasprinskiy adına cumhuriyet kütüphanesi, “Maarifçi” birleşmesi, QMPU, “Bizim Qırım” ve “Yaşlar Şurası” da ötkermekteler.

“Bugün er kes Noman Çelebicihannıñ ruhuna namaz qılğanını ister edim. O halqımız içün şeit ketti ve adı hatıramızdan ebediy silinmez”, – dedi S. Kacametova sergide bulunğanlarğa.

Serginiñ açılışından soñ Noman Çelebicihannıñ özü yazğan ve oña bağışlanğan şiirler yañğıradı

Şunı qayd etmeli ki, sergi bir ay devamında çalışacaq.