Rustem Memetovnıñ 70 yıllığına bağışlanğan «Menim yırlarım» sergisi açıldı

04 Avgust 2011

Milliy sanat ustaları sırasında degerli yer alğan yırcınıñ adı qırımtatar halq yırlarını sevgenlerge pek yahşı tanıştır. Rustem Memetov 1941 senesi iyül 26-da Seytler rayonınıñ Burnaş köyünde dünyağa keldi. Olacaq yırcı halq yırlarınıñ zenginligi, tuvğan nağmelerniñ güzelligini ta balalığında köre bildi. Onıñ babası doğma Üsküt köyünden Abdulvait Sahtara ve anası Ayserezli Emine-Şerfe halq yırlarını pek yahşı bilgen ve yırlağanlar. Yırcınıñ diger aqrabaları da usta çalğıcı ekenler. Balalıqta Rustem olarnen beraber kontsertler bergen.

1964 senesinden ve ta Qırımğa qaytqance Rustem Memetov “Haytarma” ansambliniñ solisti olıp çalıştı. O yıllarda ansamblde bestekâr İlyas Bahşış, halq yırlarını toplayıcı ve folklorcı Murtaza Velicanov, yırcılar Sabriye Erecepova ve Ediye Topçı, meşur konferansye Ablâmit Ümerov ile beraber sanağa çıqtı. Genç yırcı bütün bu ustalardan ders aldı, yırlamaq sırlarını oña Sabriye-apte ve Ediye Topçı ögrettiler. Ansamlde Rustem Memetovnıñ professional ustalığı, eski halq türkülerini icra etüv istidatı culâlandı. 1991 senesi R.Memetov ailesinen beraber Vatanğa qayta. Ve şu yıldan başlap ta 2001 senesinece “Qırım” folklor ansamblinde çalışa.

Sergide R. Memetov arhivinden alınğan onıñ icadiy asabalığınıñ çeşit devirlerini aks ettirgen resimler, afişa, taqdirlev yarlıqları, yır cıyıntıqları taqdim etilgen.

Sergi açılışında yubilârnı Qırımtatar halqı Meclisi reisiniñ birinci muavini, Bütündünya qırımtatarlar kongressiniñ prezidenti Refat Çubarov, Cumhuriyet qırımtatar tasil hadimleri “Maarifçi” birleşmesiniñ reisi, Meclis azası, Qırım Yuqarı Şurasınıñ deputatı Safure Kacametova, Cumhuriyet milletler komitetiniñ reisi Edem Dudakov, Qırım medeniyet nazirligi medeniyet müessiseleri, infoormatsion iş ve cemaatçılıqnen bağlanuv idaresi başınıñ muavini Denis Çihradze, QMPU rektorı Fevzi Yakubov, Qırımtatar yazıcılar birliginiñ reisi Riza Fazıl, qırımtatar yazıcısı, jurnalist ve şair Ablâziz Veliyev, “Qartlar evi”niñ direktorı, qırımtatar milliy areketiniñ veteranı Ayşe Seitmuratova, Meclis azası, “Adalet” siyasiy partiyasınıñ yetekçisi Fevzi Kübedinov, “Qırım” ansambliniñ yolbaşçısı Server Kakura hayırladılar. Tedbirni Cemil Karikov reberligindeki “Maqam” folklor ansambliniñ çalğıcıları, Özbekistanda nam qazanğan artist Dilâver Bekirov, Nafe Bekirov ve Nial Halilova yaraştırdılar.

Sergi Aqmescit şeeri, Çehov soqağı , 17. adresi boyunca bazarertesi kününden cuma kününe qadar saat 9.30 –dan 17.00-ge qadar; cumaertesi künü 15.00-ge qadar çalışa. Bazar – raatlıq künü.