Ruslarnıñ orduğa çeküvnen bağlı bir meselesi çıqtı – Çubarov Keriç köprüniñ qapatılmasınen bağlı haberni tefsir etti

16 Sentâbr 2022

Bazı bilgilerge köre, sentâbr ayınıñ 19-ında ruslar Qırımdan Keriç köprü vatasınen çıqışnı qapatırlar.

Bu, işğal etilgen yarımadada asker ola bilgen erkeklerni tutıp Ukrainadaki cenkke yollanacaq göñülli batalyonlarnı şekillendirmek içün yapılır.

Qırımtatar Milliy Meclisiniñ başı Refat Çubarov 24 kanalğa bunı bildirdi

Çubarov añlattı ki, Çeçenistannıñ başı ramzan kadırov rusiyeniñ bütün guberniyalarını mobilizatsiya tedbirlerini keçirmege çağırdı. Bu cümleden, er bir bölgeden eñ az biñ askerni azırlamaq, olarğa para bermek ve Ukrainadaki cenkke yollamaq içün.

– Bu, şu anda rusiyeniñ Ukrainağa qarşı cenkke çağıruvnen bağlı meseleleri olğanını köstere, – dep Qırımtatar Milliy Meclisiniñ başı qayd etti.

O añlattı ki, USQ bu cümleden özbeklerni  esir etti. Olar, Moskvada vesiqaları alınğan, muqavele tizmege mecbur etilgen br bizge qarşı cenkke yollanğan emek migrantları ediler.

– Beñzegen bir şey Qırımda da ola bilir, – dep Qırımtatar Milliy Meclisiniñ başı hulâsa çıqardı.

Qırımnıñ rus akimiyeti sentâbr ayınıñ 19-ından Qırımdan ketmeniñ tek arbiy komissarlıqnıñ yazılı izninen mümkün olacağını bildirgen vesiqanı yalan adlandırdı.