Ruslar Aburahmanovnı Rusiyege ketirmege azırlaylar, onı deñiştrimege rica ete – uquq qorçalayıcılar

05 Yanvar 2023

Qırımtatar batalyonı davasında beş senege maküm etilgen Ruslan Abdurahmanovnı Ulyanovsk şeerindeki müstemlekege ketirmege azırlaylar.

Qırım uquq qorçalayıcı gruppasınıñ saip olğanı mektüpte Ruslan Abdurahmanov bunı yazdı. 

Abdurahmanov yazdı ki, aprel ayında tutulğan soñ alâ daa Aqmescitteki 2. SİZOnıñ (Elevatornıy aralığı, 4) 61. kamerasında buluna.

Maküm etilgenniñ sözlerine köre, sağlığı yaramaylaştırdı, tibbiy yardım ise oña bermeyler.

– Ukraina maqbul organlarına tasdıq etem ki, meni Aqmescitteki 2. SİZOda qanunsız olaraq tutalar. Meni deñiştirmek ve qanunsız esiphaneden azat etmek içün sizni mümkün olğan tedbirlerni keçirmege pek rica etem, – Ruslan Abdurahmanov yazdı.

Öz ricasını Ukraina Prezidentine, UYŞnıñ mebuslarına, ombudsmanğa ve başqa vekilli kişilerge yolladı.

QUGnıñ haber bergenine köre, dekabr ayında Abdurahmanov bir mektüp yolladı. Anda Abdurahmanov Azovske (Geniçesk) köyünden hırsızlanğanı, Geniçeskteki 17. PTUda işkencelernen sorğuğa çekkeni, Aqmescitke zornen ketirilgeni, muntazam basım, qorqutmalar ve aile içün qorqu sebebinden bilgilerini aytqanını añlattı.

Bildirmelerge köre, mayıs ayınıñ 22-sinde Herson vilâyetiniñ Geniçesk rayonındaki Azovske köyünde Rus gvardiyasınıñ askerleri qamaçalav keçirdiler. Qamaçalav vaqtında işğalciler Azovskeniñ sakini Ruslan Yusupovıç Abdurahmanovnı (doğğan künü 1991 s. fevral ayınıñ 12-si) tutıp Qırımnıñ toprağına ketirdiler. İlk malümatqa köre, Asken içtimaiy teşkilâtında ve Qırımnı içtimaiy bloklaştırmada iştirak etmesi içün qabaatlandı ve Aqmescitteki SİZOda tutuldı.

Sentâbr ayınıñ 2-sinde Aqmescitteki “Kıyiv rayonı makemesi” Abdurahmanovnı beş senege maküm etildi.

Dekabr ayında Ruslan Abdurahmanov Aqmescitteki SİZOda yaramay şartlarda alâ daa bulundı. Kamerada onen beraber daa 4 kişi bulundı: kün boyunca er keske yataqqa oturmağa yasaqlandı. Er kün kamera tinttiler.