Rusiye Prezidenti Vladimir Pütin ve qırımtatar halqınıñ lideri, Ukraina halq deputatı Mustafa Cemilev telefon vastasınen 30 daqqa devamında Qırım ve umumen Ukrainadaki vaziyetni muzakere ettiler

12 Mart 2014

2014 senesi mart 12 künü Moskvada Ukraina halq deputatı Mustafa Cemilev Tatarstan Cumhuriyetiniñ birinci prezidenti, Tatarstannıñ devlet mesleatçısı Mintimer Şaymiyev ile körüşti.

Hatırlatamız ki, M. Şaymiyevniñ bundan evelki teşebbüsine köre körüşüv Qazanda olacaq edi, amma Qırımdaki vaziyet sebebinden söyleşüvlerni Moskvada keçirmek qararı alındı.

M. Cemilevniñ bildirgenine köre M. Şaymiyevnen 2,5 saatlik körüşüvde taraflar Qırımdaki vaziyetni muzakere ettiler. “Men subetdeşimniñ samimiyliginde eminim, – dedi M. Cemilev Mintimer Şaymiyevniñ Qırımdaki inqirazğa munasebeti aqqında. Şaymiyev, bu iñqirazda qırımtatarlarğa iç bir türlü zarar toqunmaması içün elinden kelecegini yapacağını işandırdı. Bunıñ kibi de o, Mustafa Cemilevge söz berdi ki, qırımtatar meselesi Rusiye yolbaşçılarınen eñ yüksek seviyedeki körüşüvlerde köterilecek.

Mintimer Şaymiyevnen olıp keçken devamlı laqırdıdan soñ Şaymiyeviñ teklifi ile Mustafa Cemilev ve Rusiye Prezidenti Vladimir Pütin telefon vastasınen qonuştılar. Bundan evel Rusiye Prezidenti Vladimir Pütin Mintimer Şaymiyevge qırımtatarlarnıñ lideri Mustafa Cemilev Moskvağa kelgen kibi olsa onıñ ile körüşmek istegini bildirgen.

Rusiye Prezidenti Vladimir Pütin ve qırımtatar halqınıñ lideri, Ukraina halq deputatı Mustafa Cemilev 30 daqqa devamında Qırım ve umumen Ukrainadaki vaziyetni muzakere ettiler.

Qırımnıñ tamır halqı olğan qırımtatar halqınıñ vekili olaraq Ukraina halq deputatı Mustafa Cemilev Rusiye Prezidenti Vladimir Pütinge Qırımdaki vaziyetke öz noqtai nazarını bildirip, Qırım ealisine nisbeten ayırımcılıq areketlerde bulunğan küçler tarafından telükeden ve bundan birinci nevbette eñ ziyade qırımtatarlar zarar köreceklerinden saqınğanını söyledi.

Vladimir Pütin iç kimse zarar körmeycegini işandırıp, öz tarafından Ukrainadaki vaqialarnıñ ketişatına fikirinen paylaştı. M. Cemilevniñ sözlerine köre V. Pütin Yanukoviç siyasetini aqlamaqtan uzaqtır.

Qonuşma devamında V. Pütin Rusiyeniñ konkret areketleri aqqında qarar Qırımda mart 16 künü keçirilgen referendumdan soñ alınacaq, dedi. Buña Mustafa Cemilev referendumnı ne Ukraina ve ne de dünya cemaatçılığı tanımaz, dedi.

Bundan da ğayrı, qonuşma detallerinde toqtalaraq M. Cemilev dedi ki, V. Pütinge Qırımda nasıldır mudafaa vekilleri ve rusiyeli arbiy küçler tarafından qırımtatarlarğa nisbeten basqı yapılğanını söylegende, Pütin: “Yapıp da baqsınlarçı!” dep cevaplanğan.

Subetniñ soñunda Vladimir Pütin Mustafa Cemilevge dialognı devam ettirmek ve vastacı olaraq Mintimer Şaymiyev belgilenmesini teklif etti.