Rusiye istinaf makemesi Oleh Fedorov ve Ernest İbrahimovnıñ ükümini deñiştirmedi

13 Iyül 2023

Moskva vilâyetiniñ Vlasıha şşqdaki İstinaf makemesi, qırım siyasiy mabüsleri Oleg Fedorov ve Ernest İbrahimovnıñ qanunsız ükümini deñiştirmedi. Qırım.Aqiqat bu aqqında haber berdi.

Makeme, Cenübiy bölge arbiy makemesiniñ qararını quvette qaldırdı — bundan evel siyasiy mabüslerni şiddetli rejimli müstemlekede 13 senege maküm etildi. İlk 3,5 seneni eñ qıyın şartlarda — epishanede keçirecekler.

Advokat Lilâ Gemeciniñ sözlerine köre makeme, qorçalayıcı tarafnıñ delillerine, şu cümleden qabaatlav ve üküm içün temel olğan rus mütehassıslarınıñ ekspertizalar vaqtında yapqanları hatalarnı köz ögüne almağan. Öz qararını İstinaf arbiy makemesi 30 daqqa içinde çıqarğan.

2021 senesi kiçik aynıñ 17-sinde Qırımnıñ Soviet rayonında, Qarasuvbazar, Bağçasaray, Aqmescit ve Aqyar şeerlerinde kütleviy tintüvler keçirildi. Evleri tintilgen soñ Qırımdaki Rusiye TFHniñ idaresine Lenur Seidametov, Tımur Yalkabov, Azamat Eyüpov, Yaşar Şıhametov, Ernest İbrahimov ve Oleh Fedorov ketirildi. TFHniñ taqiqatçıları aqrabalarına bildirdiler ki, tutulğanlarnı Rusiye CQniñ 205.5. maddesine mücibi qabaatlaylar. Qırımtatarlarnıñ Rusiyede yasaq etilgen, amma Ukrainada ve dünyanıñ başqa çoq ülkesinde milliy qanunlar seviyesinde sıñırsız faal etken “Hizb ut-Tahrir” diniy teşkilâtınıñ faaliyetine ait olğanlarını bildirdiler.