Rusiye Federatsiyasınıñ Aqmescitteki Baş konsullığı qarşısında piket iştirakçileriniñ qararı

23 May 2013

Avropa devletleri yigirminci asırda özünen beraber soyqırım, insan aqlarını aqaretlev, arbiy cinayetler ve insanlıqqa qarşı cinayetler ketirgen eki totalitar rejim – stalin ve natsist rejiminiñ tazıyığını çektiler.

Holokost, Açlıq, Sürgünlik, millionlarnen suçsız-günahsız öldürilgen çeşit milletler ve dinlerniñ insanları HH asırda kommunist ve faşist rejimi ükümranlığınıñ aqibetidir.

Bugünde-bugün şekillenmekte olğan halqara telükesisizlik yönelişleri öz içine zorluq ve adaletsizlikten halq ve insan aqlarını qorçalav işini alıp, bütün devlet ve ükümetlerni, umumen cemaatçılıqnı demokratik sistem qurmaq, insan aqlarınıñ teminlemesine imkân yaratmaq, yañı qavğa-davalarnı qozğaman içün diniy ananeler ve siyasiy medeniyette farqlarnı qıdırmamağa çağıra.

Şunı da qayd etmeli ki, faqat tarihnı aşkâr ve tafsilâtlı muzakere etüv aqiqat ve ölgenlerniñ hatırasına ve tirilerniñ degerligine ürmet esasında barışıqlıq elde etilir. Şunıñ içün de epsi devletlerniñ ükümetleri ve vazifedar insanları keçmişte insanlıqqa qarşı yapılğan cinayetler, şu cümleden qırımtatar halqınıñ sürgünligi ve on yıllar devamında ğurbet illerde yaşamağa mecbur etilmesini aqlamağa tırışqan areketlerden tolusınen vazgeçmeleri pek müimdir.

Rusiye Federatsiyasınıñ Aqmescitteki Baş konsulı Vladimir Andreyevniñ qırımtatar halqı ve sabıq SSSRdeki diger halqlarnıñ öz topraqlarından sürgün etilüvi, millionlarnen çeşit millet ve dinge mensüp insanlarnıñ öldürilüvini ketirgen Stalin rejimi tarafından insanlıqqa qarşı cinayetliklerini aqlayaraq seslendirgen açıq fikirleri sadece qurbanlarnıñ ruhuna nisbeten aqaret degil de totalitar rejimni ğayrıdan canlandırmaq, ukrain cemiyetine milletlerara duşmanlıq ve nefret saçmaq maqsadında yapılğan adımdır.

Qırımtatar halqına nisbeten SSSR kommunist rejimini aqlağan sözlerinen RF Baş konsulı kendisi ve temsil ettigi öz devleti Rusiye Federatsiyasınıñ halqara mecburiyetlerine, şu cümleden sürgün etilgen insanlar, milliy azlıqlarnıñ meselelerinen bağlı añlaşmağa qarşı çıqtı.

Biz, Rusiye Federatsiyasınıñ Aqmescitteki Baş konsullı Rğı qarşısında piketniñ iştirakçileri:

– Rusiye Federatsiyasınıñ Prezidenti V.V.Pütinden Rusiye Federatsiyasınıñ Aqmescitteki Baş konsulı Vladimir Andreyevniñ acele keri çağırılmasını,

– Ukraina Prezidenti, Yuqarı Şurası ve Nazirler Kabinetinden Rusiye Federatsiyasınıñ Aqmescitteki Baş konsulı Vladimir Andreyevni non-grata şahsı dep ilân etmelerini,

Biz, piket iştirakçileri, Ukraina ve Rusiye arasında, arasında eyiqomşulıq munasebetlerini saqlap qalmaq niyetinden kelip çıqaraq Rusiye ve Ukraina parlamentleri ayrı çinovniklerniñ, şu cümleden Rusiye Federatsiyasınıñ Aqmescitteki Baş konsulı Vladimir Andreyevniñ fesatı sebebetinden bozulmasına yol bermemek oğrunda bütün çare-tedbirlerni körmelerini,

TALAP ETEMİZ.

Rusiye Federatsiyasınıñ Aqmescitteki Baş konsullı Rğı qarşısında piketniñ iştirakçileri
2013 s. mayıs 23.